uMthunywa
GWANDA
BEHLELWE ngamashwa otsheketsha eBina Mine eGwanda ngemva kokuba behlaselwe batshontshelwa igolide ngeviki ephelileyo.
Kubikwa otsheketsha ababalisela uRichard Ncube oleminyaka engu-56, uTariro Clap (41), uBonet Ngwenya oleminyaka 31 loMzikhuzimkhulu Gumbo oleminyaka engu-22 batshontshelwe igolide elingange 22 grams kunye lemali egoqela i-1 000 rand le-$ZWL-2 200 ngamasela belele ematendeni abo ebusuku babethusela ngezikhali babaleka.
Ekhuluma lentatheli kaMthunywa uBongani Nyoni isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikile ehofisini yabo njalo bacela uzulu abaphathise nxa elolwazi lokuba izephulamthetho lezi zilubhekise kuphi.
“Udaba lwamadoda atshontshelwe igolide lemali solufikile ehofisini yethu ngakho sicela ukuthi nxa ekhona ongabe elolwazi lokuthi izigilamkhuba lezi zingaphi asibikele,” kuphetha uInsp Ndebele.
