uMthunywa
YiNtatheli kaMthunywa
ZITHWELE amagabha avuzayo izakhamizi zePumula South ngokuqobolwa ngamatshe yizinto abangaziboniyo osokubangele ukuthi bacabangele ukuthi undofa owayedume ngokuhlukuluza abantu eCowdray Park, uMaqobola wathuthela kwelabo ilokitshi.
Kubikwa abantu sebephelelwe ngamasu nanko phela kubikwa ondofa laba sebethumbe izindlu ezikhangelane lesonto yeJehovas Witness esePumula South njalo babulala uphahla lamawindi ezindlu lezi kanye lokutshaya abantu ngamatshe.
Esinye isakhamuzi esikhethe ukungabizwa ngegama laso elipheleleyo esithe singuKhumalo nje kuphela sithe ondofa laba sebeqede izindlu zabantu.
“Ondofa laba sebesikhathazile lapha ngoba bajika amatshe njalonje osekubangele ukuthi ezinye izindlu zibulawelwe uphahla kanye lamafasitela.
“Lathi sihlala sivika amatshe khonapha ngoba ajikwa njalonje. Liyathi lizihlalele lizwe selifuthwa ngamatshe elingawaboniyo ukuthi avela ngaphi. Izindlu ezinengi khonapha azisela mafasitela njalo ezinye sezilezikhala ephahleni kubangelwa ngamatshe ajikwa ngondofa labo,” kutsho uKhumalo.
Uphinde wathi uhlupho lolu solulesikhathi lwaqala kodwa khathesi ondofa laba sebebathwalise nzima kakhulu.
“Udubo lolu luqale kunyanga ezimbili ezedluleyo kodwa abantu baqala becabanga ukuthi kulabantu abagangileyo abajikijela abantu ngamatshe kukanti hatshi.
“Ngemva kwesikhathi sananzelela ukuthi akulamuntu ojika amatshe la ngoba uyalibona ilitshe liphakama lodwa lisiyatshaya amafasitela. NgoLwesihlanu oludluleyo bebesidla amahabula ondofa laba ngoba besebetshaya abantu ngamatshe okwedlulisileyo,” nguKhumalo lo.
UMthunywa uxoxe loSamantha Sibanda othe kenelisi ukukhuluma ngoba wesaba ondofa.
“Angenelisi lokhuluma, ngibaleke endlini ngoba ondofa besebeqale ukujikijela amatshe. Ngiyesaba ukukhuluma,” kutsho uSibanda.
UMthunywa uphinde njalo waxoxa loMnumzana Sibangani Ncube uveze ukuthi kuliqiniso ukuthi bahlutshwa ngondofa.
“Bayatshaya sibili ondofa laba njalo ngekhaya yikho abahlupha khona kakhulu. Ngelinye ilanga ngigeza ondofa laba bajika ilitshe layatshaya ifasitela kwathi ngesikhathi esifanayo kwavela elinye ilitshe latshaya umnyango wavuleka.
“Udadewethu ngomunye owakubonayo lokhu ngoba ngelinye ilanga etshintsha umntwana i-pamper kwasukuma isitina esigcweleyo esasijeke umbheda samtshaya.
“Ngenxa yodubo lolu samangala emapholiseni njalo satshela lokhansila othe kufanele sidinge abantu abangasilungisela uhlupho lolu,” kuchaza uSibangani.
UMthunywa uphinde wakhulumisana loPastor Ben ohlala kuleyondawo othe ngemva kokuthi izakhamizi zenze umkhuleko ondofa laba abasahluphi kakhulu.
“Senze umthandazo ngoMgqibelo ntambama lemuli ezikhathazwa ngondofa laba njalo ngiyajabula ukuthi uhlupho lolu solunganeno,” kuphetha uMfundisi uBen.
