uMthunywa
KULENYE imuli yeNyanga okubikwa ithwele amagabha avuzayo nanko phela kubikwa ondofa benza idili nsuku zonke ngokubhuqa ukudla kwalimuli kukanti amalunga asala esifa ngendlala.
Intathelizindaba ibikelwe njalo ukuthi ondofa laba balomkhuba wokubulala impahla yemuli yakoNyikayaramba njalo kubikwa maduzane nje kwavela umlilo ongaziwayo ukuthi waqala njani kwatsha izindlu zotshani ezimbili kwatshabalala yonke impahla eyayiphakathi kugoqela ukudla.
Ondofa laba kucatshangelwa ukuthi ngabezinye izihlobo zalumdeni njalo abahlaselwayo sebazama ngazo zonke indlela ukulwisa ondofa laba kodwa akuze kwasiza lutho.
Ondofa laba kuthiwa bahlupha ugogo labazakulu bakhe.
Obambe isikhundla senduna uSaunyama uthe kuliqiniso ukuthi abemuli yakoNyikayaramba bathwalelwe ubhulo ngondofa njalo indaba yabo seyake yalethwa edale.
Uthe imuli le kumele iphumele egcekeni ngokwenzakalayo ngoba yiyo eyaziyo isisusa salindaba.
Indaba le inkulu kakhulu nanko phela abantwana balumuzi abenza uGiredi 6, 1 leECD sebaze batshiya isikolo ngoba umangoye eselala eziko ngekhaya kubangelwa yikuthi ondofa bazitika ngakho konke ukudla kwemuli le.
“Ngiyafakaza ngezigigaba ezenzakala emzini wakoNyikayaramba. Lokhu sokulesikhathi eside kusenzakala osokutshiye imuli le isendlaleni esabekayo.
Okunye okwenza lokhu kubenzima kakhulu yikuthi izindlu ezimbili zalimuli zatsha kumlilo ongaziwanga ukuthi waqala njani kwatshabalala impahla kanye lokudla,” kutsho uSaunyama.
“Izigigaba ezenzakala lapha ekhaya kubikwa zibangela njalo ukuthi abantwana babe lesiyezi bacine sebephambene bengazi lokuthi benzani. Abantwana bahlukuluzekile njalo izakhamizi azazi ukuthi zibasize njani. Ondofa laba kubikwa balethwa ngesinye isihlobo sikagogo uNyikayaramba,” utsho njalo.
Indaba le seyafika enkundleni yenduna uSaunyama kanye lakunhlanganiso ezifana leye Social Welfare.
Umkhokheli wenhlanganiso yeZinatha uGeorge Kandiero uthi ugogo lo kumele aphume mgceke atsho ukuthi kwenzakalani sibili ekhaya lakhe.
“Ngibona angani ugogo angabe elolwazi ukuthi ondofa laba bavela ngaphi. Kumele aphume mgceke achaze konke ngoba phela ondofa laba sebehlukuluza abantwana abangelacala.
Ugogo lo kazame ukukhuluma iqiniso ukuze athole usizo. Nxa esazi ukuthi yena umsulwa kabuye emawofisini ethu sizame ukumsiza ngoba kumgceke ukuthi ondofa laba badla ukudla kwemuli ngoba kabakutholi abajayele ukukuthola yingakho-ke kungelanto enhle emzini lo,” kuphetha uKandiero.
