uMthunywa
KUYINTO eqakathekileyo ukuthi omama bafundiswe kunye lokukhuthazwa ukuthi bazi ngendlela zokuzivikela emkhuhlaneni wengulamakhwa, eminye imikhuhlane etholakala emacansini kunye lokusetshenziswa kwamaphilisi ama-Anti retrovirals (ARVs).
Kuliqiniso ukuthi inengi labantu liyazi okunengi ngomkhuhlane lo osuthe waba yisilwane esiyisihwaba esesiqede isizwe sethu singakhethi ukuthi siginya muntu mhloboni, ongumama, owesilisa labontanga. Kumele abantu bananzelele ukuthi nxa umkhuhlane lo uhlasela umuntu kudingakala ukuthi kube labantu abazananza lo osethe waphatheka ngalo umkhuhlane.
Sithola ukuthi nxa kulogulayo omama yibo abatholakala sebengabananza isigulane. Obaba bona kukalutshwana ukuthi sibathole beyibo abenza umsebenzi wokugcina abagulayo.
Nxa kungumama osethe wagula sithola ukuthi ubaba uyasuka ekhaya ethi yena angeke agcina umuntu ogulayo, khona kunguye njalo owaletha umkhuhlane ekhaya. Kodwa-ke akusi qiniso leli ngoba esikhathini esinengi omama bazithola beyibo abaphathelwa umkhuhlane endlini ngobaba abangenelisi ukuziphatha. Obaba abanengi abazi ukuhlala belomfazi oyedwa, asazi ukuthi kuyinto eyimvelo kumbe yikuzenzisa nje.
Kuyinto ebuhlungu njalo elihlazo ukuthi ngezikhathi lezi esibona abantu besifa okwempukane, sithole umuntu omdala elokhu engoqonda ebhawa ukuyadinga amanye amankazana. Kambe kuyini okwenzakalayo emhlabeni?
Omama kumele bakuzwisise baphinde batshengise ukuthi baphatheke kakhulukazi ngokudinga indlela zokuzivikela ngoba akusinto elula ukuhlala lomuntu wena umazi ukuthi indlela aphila ngayo kayiqondanga njalo ulabafazi abanengi ahlangana labo emacansini.
Kambe omama bayafuna ukufa ngoba bethi akula nto abangayenza?
Hatshi, ikhona into abangayenza njalo zinengi indlela ezingabaphathisa ekuzivikeleni kulumkhuhlane.
Okwakuqala ngokokuthi nxa ubaba engasazwisiseki kumbe usazi ukuthi uyangenangena ungathatha okungokwakho umtshiye kumbe uqale ukudinga izindlela zokuzivikela.
Kuliqiniso ukuthi kuyinto enzima ukuthi umama atshiye umuzi wakhe njalo ezikhathini ezinengi nxa umama esengothethweyo akusalula ukuthi athwale okungokwakhe alubhekise ngakibo.
Siyakubona ukuthi kuyinto enzima ukusuka emendweni ngakho-ke omama kumele baqale ukuthatha amanyathelo okuzivikela ngoba kubuhlungu ukulethelwa umkhuhlane endlini wena usazi ukuthi awuzange wenze nto engalunganga.
Abanye omama bangabuza ukuthi nxa izinto sezimi kanje kambe bangazivikela kanjani.
Okwakuqala umama angabuza ubaba lo ukuthi kungani izinto sezingasamanga kakuhle ekhaya. Bangabona ubaba ekhanya engangeneki kumele batshengise ukuthi bona sebefisa ukusebenzisa amakhondomu.
Ngempela akulula ukuluvusa loludaba endlini ikakhulu nxa lingabantu abatshadileyo, amadoda amanengi angeke avuma ukuthi asebenzise amakhondomu labomkabo kodwa kuyinto okumele ikhulunywe ngayo. Uyahlaliswa phansi ubaba ancengwancengwe kuthi-ke angala umama azame ukumbikela ukuthi ufisa ukusebenzisa lawana awabafazi asebenza ngandlela ephosa ifane lala awabobaba.
Kambe yikuphi okungcono ukufa ukhangele ukuthi nansi isitha sesizongibulala kumbe ukusibalekela singakafiki esangweni lakho.
Enye into eqakathekileyo ngeyokuthi omama sokumele baqale ukuguqula indlela abahlonipha ngazo omkabo.
Ukuhlonipha umkakho akutsho ukuthi sokumele wenze yiloba yini afuna ukuthi uyenze kodwa kutsho ukuthi lawe uyakuhlonipha njalo uyenelisa ukumtshengisa umbono wakho mayelana lezinto ezitshiyeneyo.
Inengi labomama abasemaphandleni litshengisela ukuthi livele liyesaba omkabo ngoba loba ubabuza ukuthi bangenelisa ukuthi bacele obaba ukuba baqale ukusebenzisa amakhondomu uzwa sebezithulele besehluleka ukuphendula ngoba bayabesaba omkabo.
Ukuphathwa kubi kwemikhuba kudala ukuncindezelwa lokuhlukuluzwa okutshiyeneyo njalo ngalezinsuku akumelanga izinto zibe ngezimi kanje ngoba kuyafiwa okwamagama.
Kuleminye njalo imikhuhlane etshiyeneyo engatholakala ngokuya emacansini lobaba olayo le mikhuhlane njalo layo le mikhuhlane ingavikeleka abantu bangasebenzisa amakhondomu ngendlela eqondileyo njalo ngasikhathi sonke.
Imikhuhlane le ilakho ukuba mibi okungabangela ukuthi umuntu aphatheke kabi ngoba phela nxa ingaselatshwanga iya isiba mibi kakhulukazi.
Omama kumele bafundiswe ukuthi amaphilisi okuqoqa imuli kakuhle awavikeli umuntu emkhuhlaneni wengula-makhwa kumbe eminye etholakala emacansini kodwa avikela omama ekuzithwaleni ngakho-ke bangazikhohlisi besithi njengoba bewasebenzisa abayi kuba lalumkhuhlane.
Phela abanye omama bethemba ukuthi batshadile njalo abalawo amatshamali ngakho-ke abayi kubamba umkhuhlane wengculaza okuyinto emangalisayo.
Abazi ukuthi amadoda abo ayabe esenzani lapho betshiywa endlini wona esiya ebhawa.
Ezinye ingcitshi ezikhangela ngezemikhuba yabantu zake zakhipha umbiko othi, phakathi kwamadoda alikhulu anatha utshwala emabhawa lezinye indawo ezinjeya angamatshumi ayisitshiyagalolunye seke aya emacansini lamakhikhitha.
Kambe omama bangathi bavikeleke kanjani nxa obaba besenza kanje. Angithi omama abahamba ebusuku laba baya emacansini lamadoda atshiyeneyo angaziwayo ukuthi angaba mangaki ngosuku.
Kubikwa njalo ukuthi inengi labomama laba lilenhlawulo eliyibhadalisa obaba abafuna ukuya emacansini kungasetshenziswa makhondomu.
Lokhu kunqumisa igazi labomama abanengi kodwa kuliqiniso, ubaba lo uzasuka endlini ayebonana lamakhikhitha la abesephenduka-ke endlini acele okungokwakhe kuwe njalo. Wena njengomama othethweyo awazi lutho. Ucina lawe usulawo umkhuhlane.
Sinanzelele ukuthi asitsho ukuthi abakho omama abakwenzayo lokhu ukuba labangane besilisa abanengi ngitsho phela amatshamali, kodwa kwandise ukuba ngobaba abakwenzayo lokhu.
Umama usengazivikela ngamakhondomu kumbe ekele nje ukuya emacansini lobaba lo. Okunye angakwenza yikusuka ekhaya nxa esazi ukuthi ubaba lo angabe esengothwele umkhuhlane njalo kangeke wavuma ukusebenzisa amakhondomu.
Into ebuhlungu yikuthi omama abanengi bazawuthola lumkhuhlane bengazi ukuthi ubaba abahlezi laye wawuthola ngaphi kukanti abanye sebawuthola.
Kodwa ulwazi lolu lokunye okunengi okunjengezindlela umama angavikela ukuthelela umntanakhe umkhuhlane wengulamakhwa bangaluthola emakilinika aseduzane labo.
