uMthunywa
OMAMA bakuleli badlala indima enkulu empini kaZibuse yiloba nje babekhangelelwa phansi. Kuliviki sigubhe usuku lokukhumbula amaqhawe elizwe kanye lolwe-Defence Forces Day, sizathi ukukhangela amanye amaqhawekazi abekwa eHeroes Acre.
Amanye ala maqhawekazi agoqela uMama uSally Mugabe, uMama uJohanna Mafuyana owayengunkosikazi kaMdala Wethu, uJoshua Mqabuko Nkomo, uKhomuredi Julia Zvogo, UKhomuredi Ruth Chinamano kanye loSabina Mugabe.
Amanina la adlala indima enkulu ngesikhathi sempi yenkululeko kanye lalapho ilizwe selithole inkululeko njalo labo sibaphakamisa njengamaqhawe esilisa.
UKhomuredi Sarah Francesca Mugabe owayesaziwa kakhulu ngelokuthi Sally Mugabe wayengunkosikazi kalo owayenguMongameli uRobert Mugabe. Wabhubha ngomnyaka ka-1992. Umama Mugabe wazalelwa elizweni leGhana ngomnyaka ka-1931. UMama Mugabe kanye lewele lakhe bazalwa emulini eyayiphatheka kwezombangazwe ngesikhathi leso. Wenza izifundo zakhe e-Achimota Secondary School andubana ayekuba ngumbalisi. Umama Mugabe waziveza ukuba wayelentshukuntshu kwezombangazwe njalo wayekhankasela ukukhululwa kwabantu abansundu ngaso sonke isikhathi.
Umsebenzi wakhe waqala ukubonakala ngabo-1962 lapho ayephatheka ekugqugquzeleni amanina ukuthi asukumele phezulu alwise izimiso zesisekelo sombuso sika-Ian Smith okwenza wacina egconwa nguHulumende kaSmith waze wasiwa ejele ngemva kokuphiwa iminyaka emihlanu ngumthethwandaba. Ngo-1978 wakhethwa ukuba abengumsekeli kanobhala weZanu-PF kugatsha lwabesifazane iWomen’s League wazokhethwa njalo ukuthi abe nguSecretary General weZanu-PF Women’s League ngo-1989.
Wasweleka mhlaka 27 Zibandlela 1992 ngemva kokulwisana lomkhuhlane wezinso. Wabekwa eNational Heroes Acre eHarare.
Omunye wabomama abamqoka phakathi kwamaqhawekazi akithi nguSabina Mugabe owazalwa mhlaka 14 Mfumfu 1934 wabhubha mhlaka 29 Ntulikazi 2010.
UMugabe wayengumeli wedale lePhalamende weMakonde East kusukela ngo 1985 kusiya ku 1990 kanye leZvimba South kusukela ngo 1990 kusiya ku-2008. UKhmrd Sabina Mugabe wabhubha eseleminyaka engu-75 kulandela ukugula okwesikhathi eside. UKhrd Julia Tukai Zvobgo wazalwa mhlaka 8 Lwezi ngomnyaka ka 1937 eShurugwi wabhubha 16 Nhlolanja 2004 eHarare.
Umsebenzi wakhe wezombangazwe waqala ngama 1960’s lapho akhethwa ukuthi abengunobhala wophiko lwabomama ehighfields eHarare.
Wafunda wathola ama degree amabili engakasuki waya eMozambique lomkakhe lapho afika wakhethwa ukuthi abe ngumqondisi obona ngezabomama kunkamba zamasotsha. Ngemva kokubhubha kwakhe wabekwa eNational Heroes Acre mhlaka 19 Nhlolanja 2004.
URuth Lottie Nomondo Chinamano ngomunye wamaqhwekazi akithi. Wazalwa mhlaka 16 Zibandlela 1925 eCape Town wabhubha mhlaka 2 Zibandlela 2005.Ngomnyaka ka 1955 uNkosikazi Chinamano waphelekezela umkakhe uKhmrd Chinamano eBirmingham, kweleUnited Kingdom, lapho afika waphatheka kumihlangano eminenginjalo wafunda okwenyanga eziyisithupha engakaphenduki kuleli.
Ngo 1964 yena lomkakhe babotshwa basiwa eGonakudzingwa Restriction Camp. Basebesiwa eWhawhalapho abahlala khona kwaze kwafika umnyaka ka 1970.
Wangena kuPhalamende ngomnyaka ka1980.
UJohanna Mafuyana Nkomo wazalelwa eMatopo ngomnyaka ka 1927.
Wenza izifundo zakhe eSt Joseph’s Primary School wasesiya eDominican Sisters Convent koBulawayo lapho asebenza engu-matron.
Yikho lapho ahlangana khona loKhmrd Nkomo basebetshada ngo 1949. Umama mafuyana wesebenza gadalala ukusekela umkakhe ngesikhathi sempi yenkululeko. Wayehlala ehlukuluzwa ngabamhlophe ngenxa yomsebenzi owawusenziwa ngumkakhe. Wagcina imuli yakhe okwesikhathi eside umkakhe engena lokuphuma ejele. Ngomnyaka ka 1980 kusiyafika usuku lwakho lokwedlula emhlabeni uMama Fuyana wasebenzela ukubambana kwamaZimbabwe onke. Wayephathisa intandane kanye Labantwana abaswelayo ngaphansi kohlelo lweChild Survival and development Foundation. Wabhubha mhlaka 3 Nhlangula 2003 njalo laye wabekwa eNational Heroes Acre.
