uMthunywa
Thokozile Mbedzi
BAME amadlodlongwane bathwala imikhono emakhanda abantu edilini ngesikhathi omunye umfana oleminyaka engu-17 egwaza amadoda amabili eyodwa yafa kubangwa ukuthi bachithe utshwala bakhe.
Umfana lo, esingeke saveza igama lakhe ngoba eleminyaka engaphansi kwengu-18, wesigabeni seMagodobo eMakakavhule eBeitbridge kubikwa ugwaze uNqobizitha Siziba kunye loVictor Ndou ngoMgqibelo owedluleyo.
Kuzwakale ukuthi umetheswacala wayenatha uMagwebu ngesikhathi uSiziba aze achithe utshwala bakhe. Kubikwa umetheswacala utshwala sebuchithekile wahle wakhipha ingqamu esikhwameni wagwaza uSiziba phezulu kwenkaba. UNdou uthe ezama ukuyalamula laye wagwazwa.
Ekhuluma lentatheli kaMthunywa uMnumzana Ben Moyo uthe lokhe bethukile ngesenzo somfana oleminyaka engu-17 oselesidumbu phansi kubangwa utshwala.
“Bekulesilo koPhiri kungakho bathe benatha uNqobizitha wasechitha utshwala bomfana lo wahle wamsukela wamthela ingqamu phezulu kwenkaba.
“Isikhathi senjabulo siphenduke saba ngesosizi ngoba abantu sebegcwele igazi nanko phela loNdou uthe uyalamula laye wagwazwa.
“Ababili laba bathwalela ekilinika yeMakakabule kodwa bobabili basebedluliselwa esibhedlela seBeitbridge District Hospital,” kuchasisa uMnu Moyo.
Kubikwa uNqobizitha wahle wedlula emhlabeni esanda kunikwa umbheda esibhedlela.
“Sonke silapha sithithibele ngesibindi somfanyana lo ukuthi wasithatha ngaphi. Njengezakhamizi sahle samdinga samusa emapholiseni,” kulandisa uMnu Moyo.
Isikhulumi samapholisa esabelweni seMatabeleland South uLoveness Mangena ebuzwa ngodaba lolu uthe solufikile ehofisini yakhe.
“Sithanda ukuxwayisa uzulu ukuthi engabohamba ethwele izikhali eziyingozi ngoba akuvunyelwa emthethweni njalo abantu kabalandele njalo imithetho yeCovid-19 .
“Abantu nxa besuke baba lengxabano kababikele amapholisa loba abaphathi bezigaba ukuze bexazulule ingxabano ngendlela eqondileyo singalahlekelwa yimpilo njengalokhu okwenzakeleyo,” kuphetha uInsp Mangena.
