uMthunywa
Thokozile Mbedzi
ZILOKHU zinkemile izakhamizi zesigabeni seSentethe eLupane ngemva kokuba amadoda amabili ethumbe adlwengula umntwana oleminyaka yokuzalwa engu-13.
Inkundla yeLupane izwe ukuba uJohn Mpofu oleminyaka engu-20 yokuzalwa lo Nkosiyapha Sibanda oleminyaka engu-26 yokuzalwa bonke bengabesiqintini seSenthethe kodwa behlala emizini etshiyeneyo bathumbe baphinda badlwengula unkazana oleminyaka engu-13 okwamalanga amathathu.
Ekhuluma lentatheli kaMthunywa uViolet Mabhena ongumakhelwane uthe lokhe bethithibele ngalokhu okwehlele umntwana omncane kangaka. “Lokhu okwenzakale kuntombazana le kubuhlungu njalo kuyadabukisa.
Kambe amadoda amadala aze abophe iqhinga lokudlwengula umntwana omncane kangaka.
Ngokutsho kwabasiki bebunda uJohn wathumba umntwana wahlala laye okwamalanga amathathu embamba iganyavu kokuphela.
“Umntwana uthe esemphunyukile uNkosiyapha mdlwenula okwamalanga amathathu elokhu ehlala laye emthumbile.Umtwana lo uthe sephunyukile uNkosiyapha wambona laye wamdlengula kanye. “Lokhu kuzwisa ubuhlungu kakhulu losizi sesithembele ukuba isandla somthetho sizadlala indima yaso sijezise omsolwa ngoba sebephambanise impilo yomntwana”, kulandisa uNkszn Mabhena.
Umantshi uDumo Masuku uthe omamangala kabahlale entolongweni icala labo lizabuye lithethwe mhlaka 6 Mpandula.
Umtshutshisi wecala leli uMnumzana Clive Gumbo ubikele umthethwandaba ukuba ababili laba baphana amathuba okudlwengula umntwana lo besazi mhlophe ukuthi badala icala njalo baphambanisa impilo yakhe.
