uMthunywa
Thokozile Mbedzi
ZISELE zithithibele izakhamizi zesigabeni seZezani eBeitbridge ngemva kokuba elinye inina lilume isitho sangasese somkalo ngeviki ephelileyo kubangwa ucansi.
Kubikwa inina leli okutholakale ukuthi nguNaCalvin kuphela nje lilume umkalo uSibangilizwe Ndlovu ngemva kokuba kuqhamuke ingxabano phakathi kobusuku kubangwa ukuba indoda kayisawudlali ngendlela umdlalo wasekamelweni lokulala.
Kubikwa kwaba lomsindo ngobusuku lobu okwabangela ukuthi uNaCalvin alume indoda kabuhlungu aqathe lesikhumba okwenza umkakhe wakhala okosane andubana omakhelwane bagijimele emzini wabo. Ekhuluma lentatheli kaMthunywa umfakazi oqotho uMnumzana Jabulani Moyo uveze ukuthi ababili laba sebelamalanga bengani abazwisisani kodwa ukuthi uhlupho lwabo kuyini abantu bebengalwazi. Besingazi uhlupho lwabo sokuze kwavela sobala ngoba uNdlovu esekhulume iqiniso laye unkosikazi wakhe esethetha ukuba yena ngeke ahlalele umuntu ongasawenzi umsebenzi wakhe ekamelweni lokulala.
“USibangilizwe lonkosikazi wakhe sebelamalanga besilwa, besingazi ukuthi indaba ebangela ukulwa phakathi kwabo yini sibisibili kodwa bebehlala bethethisana kusa kwamalanga.
“Mina ngokwami ngangizibuza ukuthi udubo lwabo ngolwani ngoba amagama ababephendulana ngawo ngayangisayo pho nxa umuntu engasabuyanga wakubikela ezomuzi wakhe kunzima ukuthi uyefaka amakhala emzini wakhe usubuza ungumakhelwane.
“Sivuswe ngumsindo phakathi kobusuku ngeSonto kuzavuka kunguMvulo uNdlovu esebovula kabuhlungu yikho ukugijima kwethu sisiyakhona ukuyakuzwa ukuthi kuyini okwenzakalayo indoda ize ikhale kangaka. Sithe sifika sathola belokhu bedumelene bebhunyumunyu unkosikazi kaNdlovu elokho eluma indoda yakhe isitho laye elokhe ewuhlaba umkhosi eseze engani usephela umoya.
“Into esuke yangethusa ligazi ebeselintshaza esithweni sikaNdlovu kungakho-ke sabaxakulula kodwa ubeselimele. Sahle sadinga amadonki kungasakhethwa ukuthi atholakeleyo ngakabani samthwalela esibhedlela,” kutsho uMnu Moyo.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe uzaphenyisisa ngalo ngoba alukafiki ewofisini yakhe.
Induna yakulindawo uDavid Mbedzi Tshitaudze ebuzwa ngodaba lolu uthe useluzwile njalo khona ezaxoxisana lomlisa wesigaba lesi ngoba okwenzakeleyo kubi kakhulu.
“Udaba lwenina elilimaze umkalo sengiluzwile, ngikhangelele ukuhlala phansi lomlisa wendawo le ngoba akuqondanga esintwini sethu ukuba abantu abathetheneyo balwe baze balimazane. Kumele nxa kuthe kwaba lokungazwisisani kubikelwe osobhuku, induna kanye lomlisa. Kwesinye isikhathi loba omuntu othembakale emulini ongancedisa eluleke labo axabaneyo ngoba sikhuthaza ukuhlala ngokuthula hatshi ukunqunulana ngendlela eyenziwe ngumama lo.
“Kambe umuntu angaze alimaze indoda azale layo abantwana kabuhlungu kangaka asikuvumeli thina lokhu njengabaphathi ngoba uzenza abanye omama bafunde umkhuba omubi,” kuphetha induna uTshitaudze.
