uMthunywa
Ethel Ncube
ZISELE zikhakhamele izakhamizi zeChipale eBinga ngemva kokuba enye intombazana ihlephune enye indlebe kubangwa ijaha.
Isiga lesi senzakale emavikini ambalwa edluleyo lapho uPrecious Mudimba alume khona uMercy Nleya wamqatha indlebe kubangwa ukuthi usemthathele ijaha.
Esinye isakhamuzi esikhulume lentatheli uNkosazana Joice Ndlovu uchaze ukuba kalankani ngamantombazana la womabili.
“Mina ngangisiya kukha amanzi esibholaneni ngathola omunye esevuza igazi endlebeni kuluthuli ngapha bephethe bethethisana kubangwa ukuthi kungani omunye ekhombe ijaha lomunye.
“Ngababuza ukuba ukhona yini osekhitshelwe lijaha lelo kodwa baqhubeka bephikisana omunye esithi nguye owaqala ukuthandana lalelojaha.
“UPrecious wathi okumcaphule kakhulu yikuthi wabona umfanekiso kaMercy kumakhalekhukhwini wejaha lakhe yikho nje wacina emlanda esiyamtshaya,” kubika uNkszn Ndlovu.
Intatheli ixhumane njalo loPrecious Mudimba owaluma omunye kubangwa ijaha.
“Mina ngambuza ukuba kungani ethandana lomuntu wami yena wangiphendula wathi nxa ngifuna owami ngizibazele yikho okwenza ngacina ngimbeka isandla, ngangingajonganga kumluma.
“Ubufakazi ngangilabo ngoba ngabona inombolo zakhe lemifanekiso yakhe kumakhalekhukhwini kaJohn, yikho ngamlanda ngifuna ukuzwisisa wafika wangimbuluzela,” kubika uPrecious.
UMthunywa uxhumane loJohn Sibanda onguye ijaha elalibangwa oveze ukuba kaboni cala ngokuthandana lamankazana amabili.
“Kithi isithembo siyavunyelwa njalo ngiyenelisa ukubathatha bonke, ukulwa kwabo lokhu akulangqondo. Ngizabakhawulisa ngibale, ijaha alibangwa njalo liyenelisa ukuthatha abafazi abedlula ababili,” kuphetha uSibanda.