uMthunywa
Isibongo somuntu kudala ilizwe lisahlezi kuhle sasikhomba ukuthi umuntu uvela ngaphi kwendawo njalo lokuthi ungumuntu bani.
Kwakuthi nxa kufiwe kukhethwe elinye ilunga lomdeni elihloniphekayo njalo elizakhuluma kuzwakale, kuthule wonke umuntu oyabe ekhonapho efuna ukuzizwa laye ebongiwe.
Ngikhumbula komunye umngcwabo kwakhethwa omunye ubabomdala waleyo muli kwathiwa nguye ozabongela imuli. Phela okokukhuluma kufuna umuntu ojwayeleyo kumbe umuntu oseke waba ngumbalisi ngoba ekwejwayele ukukhuluma ekhangelwe ngamehlo amanengi.
Wazwakala umuntu omdala ilizwi lakhe liqhaqhazela, kulokuthi abonge abantu nango elandisa ngobungane bakhe lomufi waqala besekweluseni baze baya esikolweni njalo ekhuluma elokuzikhukhumeza ukuthi yena yedwa qha nguye owayesazi umufi ukwedlula wonke umuntu owayelapho. Lokhu kwacunula abantu abanengi bakuveza ngokungasamlaleli sebezixoxela ngokhula emasimini nanku phela kwakuyisikhathi sehlobo.
Banengi abantu abathi bangacelwa ukuthi babonge abantu kodwa umuntu wakhona asuke athatheke azikhulumele okunye abantu bacine sebenxapha bakhohlwe ukuthi basemfeni.
Ngikhumbula komunye umngcwabo kwakhethwa umakhelwane womufi ukuthi abonge abantu kanti sethole ithuba lokukhuluma izikhwili zabo wezwakala ethi bakhona abantu abangakhanukekiyo loba ungaze unqobe ku-lotto ngeke uze umhlephunele mbijana njengalo owayeselele lapha. Bathithibala abantu bakhamisa kwaze kwakhanya izilakalaka bengazi ukuthi bathini ngoba beqala ukuhlangana lensumansumane yendaba le. Wonke umuntu owayelapho wafika exoxela abakibo.
Kulula ukubonga abantu emfeni, ungaphonguthi wonke umuntu olapha akazizwe ebongiwe nanku phela awungeke ubaqambe ngezibongo zabo bonke ngoba abanye ungabazi.
Ayixabene.
