uMthunywa
KUVAMILE emadodeni amanengi ukuthi angasuka ayedinga imisebenzi emazweni esakhelene lawo, afika axotshe impala ezimbili, adinge umsebenzi lowesifazane kuqala kungumakhwapheni ngoba umuntu nxa esanda kufika emazweni abanikazi ingqondo iyabe isahlelekile njalo ekhumbula lekhaya ethinta abasemuva ngocingo njalonje.
Kuthi nxa umuntu esemile impande lengqondo isingenwe ngupongwe akhohlwe ngoba esethole oMatshidiso eGoli. Lokuthumeza omunye uvele alibale aze ayebuya lokuzimpahlana ngoMpalakazi nxa esebuya kuKhisimusi.
Yena ngenxa yokuthi uyabe elala ngesibomvu, lenkanuko zemvelo uyabe ezelaphela ngaboTholakele bakhonale eMzansi, ngapha ekhaya unkosikazi wakhe uyabe ehleli ebalisa ebala inkanyezi elindele umkakhe angazi lokuthi ubuyanini. Aswele lokuthi inkanuko yemvelo uzayithundubeza ngani aze athi nxa esesibholaneni ebona amadonki exotshana aze ahawukele, omunye ngokuyekelela imizwa ucina ekhomba ethi engabanjwa uphele umendo.
Phela isela ngelibanjiweyo nxa esethe wabanjwa abantu abaze bakuhluzisisa ukuthi umkakhe useleminyaka ethize engabuyi ukuzopholisa amaseko emvelo njalo omunye lokuthumeza engathumezi, phela uyabe efuna ukugeza laye umntanabantu.
Isimanga yikuthi bona laba okuthiwa ngabafazi bekhaya yibo abathwala ubunzima nxa sekuthe indoda yakhona yagula kumbe idlule emhlabeni, oMatshidiso banyamalala njengomswenya babuthe lempahla eyabe isendlini yokubhacekisa eGoli, abuye umuntu emfazini wakhe ekhaya engelalutho sekungani ngumuntu ovela khama ithumbu ezixukwini.
Ngikhumbula omunye umngane wami bathi oTholakele beGoli sebebona ukuthi usegulela ukufa bamtshova kumalayitsha bathi uzabhadalelwa ngabakibo ekhaya. Lakanye wafika, umkakhe wathengisa inkomo ngoba umalayitsha wayesevutha amalangabi.
Zwana-ke dadewethu ungavumi ukuba ngumfazi wekhaya, ungahlala hlala landela lawe uyebona lapho asebenza khona lalapho ahlala khona ukuze bakwazi ukuthi ungumkakhe, ungabona esala ukuthi umvakatshele wohle uyifunde ivaliwe, kambe kulomuntu ongala yena ephathelwe amanzi okucitsha ukoma kwemvelo.
Kumele ube lobukhwele ngoba lemikhuhlane ibhahile, ungavumi ukuba ngumfazi wekhaya.
Umlobi ungamthinta ku: 0714355641
