uMthunywa
YiNtatheli kaMthunywa
KULEXHEGU elihlala kuVillage 2, eShangwa, endaweni yeBeatrice okubikwa lihlanyisana lomalukazana walo osekuze kubangela ukuthi libe lobukhwele lamanye amadoda athandana lomalukazana lo.
Umalukazana lo, uVaraidzo Pasha (31) useze waxotshwa koyisezala wabiselwa ngakibo eChecheche, eChipinge.
Kuvele njalo ukuthi, abazali bakaPasha bathi ngeke bamamukela kungahlawulwanga iR3 000 ngenxa “yesenzo” lesi.
Simbarashe Muzenda
UKhulu uKenneth Muzenda (73) uthe loba umalukazana wakhe esithi bayathandana kodwa ngamanga aluhlaza.
Kusenjalo umalukazana kalanhloni ngitsho ukuchaza ukuthi yena uthandana loyisezala njalo sebeke bembatha ingubo bonke.
UKhulu uMuzenda uthe indaba yokuthi uthandana lomalukazana wakhe ihlose ukugcolisa igama lakhe kulandela ukumbhaca elenye indoda.
“Umalukazana lo wabuya lapha ngenyanga kaMbimbitho lonyaka, uthethwe lizibulo lami uSimbarashe Muzenda (31).
Bebelala ekamelweni eliphakathi lomkakhe ngasenginanzelela ukuthi uyabalekela umkakhe ebusuku, aphume ngefasitela esiya kwamanye amadoda okulicala alivumayo.
“Ngesikhathi ngimbuza yikho lapho athi mina ngithandana laye,” utshonjalo uKhulu uMuzenda.
Uthe umalukazana wakhe lo wayesenzenje ngoba indodana yakhe ilomkhuhlane wokuwa okubangela ukuthi angalala kavuki masinya.
“Umalukazana lo waqamula insimbi ezivala amafasitela lapho abeseqa khona esiya kwamanye amadoda kugoqela lomunye ujaha owayeselusa inkomo lapha.
Kambe ngiyabe ngisweleni ngize ngithandane lomalukazana wami?
“Senginanzelele ukuthi uyangigcolisa, ngahle ngamxotsha lapha ekhaya ngambisela kibo eChipinge,” utshonjalo ubabazala lo.
Uthe umalukazana wakhe wayafikela kundodakazi yakhe, uGrace Muzenda, ohlala eChecheche eChipinge lapho ahanjiswa kwenye indodana yakhe, abazali bakhe sebeyale ukumamukela ngoba sebezwe ukuthi ubethandana loyisezala.
“Umalukazana lo wabuya lapha njengonkosikazi wendodana yami evela kundodakazi yami, eseChipinge.
Efika khonale watshela abazali bakhe ukuthi ngithandana laye.
Ifasitela okwakuseqa khona uPasha
Abazali bakhe sebesithi le, yindaba okumele ihlalelwe phansi sihlawule ngokusebenzisa indodakazi yabo, ngoba ubethandana lomkakhe aphinde athandane lami.”
Umalukazana lo, uPasha ekhuluma lentatheli ekoyisekazi, lapho acelelwa ukuthi ahlale khona njengoba wayesexotshwe kwabozala uthe kuliqiniso ukuthi uthandana loyisezala.
“Ubaba wangikhombisa sathandana saqala ukwenza nje konke okwenziwa ngabathandanayo, futhi wayengangiphi lutho.
Le yindaba eyaziwa ngabantu bonke beShangwa.
“Ngangithandana labo bobabili, ubaba lomntwana, ngicatshela umamazala.
Kunengi, fikani lapha sikhulume. Le yindaba esisenduneni lapha eMariya,” utshonjalo uPasha.
Intatheli kayenelisanga ukukhuluma lezihlobo zikaPasha.
USimbarashe Muzenda uthe indaba yokuthi uyise uthandana lomkakhe yamephula umoya.
“Ubaba lomkami kukhona ababekwenza yikho lami ngehlukana lakho ngathi kabiselwe kibo eChipinge.
Okunye futhi umama lo, ubehlala engitshaya, kungakho kangisamfuni,” utshonjalo uSimbarashe.
Unkosikazi kaKhulu Muzenda, uJudith Chirinda Muzenda (70) uthe wahamba enhlane lomalukazana wakhe, lapho okwathiwa kakhulume konke okubi akwenzayo.
“Ngokunjalo wachaza ukuthi uthandana lobaba walapha kunye lendodana yethu.
Phezulu kwalokho wachaza ukuthi kulomunye njalo ujaha owayeselusa inkomo athandana laye, uTinashe.
Wathi babehlangana esibayeni sembuzi kunye lesambuzi lapho athi wayeke ahlangane njalo lobaba (uyisezala) khona,” utshonjalo uGogo Muzenda.
Uthe wacina esiba lolaka watshaya umalukazana lo wachaza okunye okunengi ngokuthandana kwakhe loyisezala kunye lamanye amadoda esithi umkakhe kamsuthisi.
“Kangizange ngitsho langelanga elilodwa ngibhace umkami lomalukazana.
Mhlawumbe yikuthi ngivele ngilesikhathi engisuka ngaso ngisiya enhlane kunye lalapho engake ngahamba ngisiyathathisa abantwana izithupha.
Aluba ngabakhanda omunye wayezakufa ngoba ngiyasitshova hayi kancane isibhakela,” utshonjalo uGogo Muzenda.
Uthe umalukazana lo wayetshela abantu ngokuthi umkakhe kamsuthisi nxa esesibholaneni.
“Izibulo lami, eliyilo elithethe umalukazana lo lasuka lapha lisiyakwelatshwa eChipinge lapho ahlangana khona loPasha bathandana wasebuya laye ekhaya. “
UTinashe Makosha (18) owelusa inkomo uvumile ukuthi uthandana loPasha.
“Siyathandana loPasha. Kwaqala ngesikhathi sisala sobabili ekhaya. Izikhathi ezinengi sibonana endlini kumbe e-change house yokugezela.
“UKhulu uMuzenda laye ngambona amahlandla amanengi engaziphathi ngendlela engakhangelelwanga kubabazala lomalukazana wakhe.
Lami wayengenzela ubukhwele uKhulu,” utshonjalo uMakosha.
