uMthunywa
KULANDELA udaba lwexhegu elife ngemva kokuba umakhelwane walo egamule isihlahla salo se-avocado ebesisegumeni laso elokitshini leMzilikazi koBulawayo uMthunywa ukhulumisane lezazi kwezamasiko wathola ingcazelo eqotho mayelana lesizatho sokufa kwalelixhegu.
UMthunywa uxhumane lesazi kwezamasiko uMnumzana Khumbulani Magutshwa wathi ngokwesiko kulezihlahla okuzilayo ukuthi ziganyulwe ngemva kwemvumo yalowo owasihlanyelayo.
“Khona ngokwesiko kulezihlahla ezilamazilo aphathelane lazo kulabo abazihlanyelayo. Isihlahla se-avocado laso silemikhuba etshiyeneyo ephathelane lalowo owasihlanyelayo. Okokuqala ohlanyele lesisihlahla kwakuthiwe kasidli kutshiwo ngoba mhla siqalisa ukuthela uyafa nxa kungasenziwanga umkhuba ophathelane laso kodwa ungenziwa kafi,” kulandisa uMnu Magutshwa oyisazi kwezamasiko.
“Ngalokhu-ke isihlahla lesi akufanelanga siganyulwe ngaphandle kwemvumo yalowo owasihlanyelayo ngoba singaganyulwa kungenziwanga umkhuba ophathelane lokuganyulwa kwaso umasihlanyela uyafa. Lokhu kungabe kuyikho okudale ukuthi umninisihlahla lesi esiganyuliweyo afe ngoba kwenziwe kungakaqhutshwa umkhuba waso,” kuphetha uMnu Magutshwa.
