uMthunywa
EMINYAKENI edluleyo bekuthi nxa kufika ikhefu elifana lelePhasika thina esihlala duze komngcele weNingizimu Africa leZimbabwe, ubusizwa ngobumve mve bemihlobo hlobo yezimota zivelela eGoli zisiya endaweni ezitshiyeneyo.
Lamabhasi asuka emadolobheni abesuka egcwele ezinye izihambi zize ziswele indawo zokuhlala, zihambe zimile ngoba zinxwanele ukuyafika emakhaya lapho okulenkaba zabo khona.
Bebephunguka abantu amadolobho asale etshaywa ngumoya. Empeleni bekusiba lezinto ezinengi ezenzakalayo ezinjengemitshado, ukuyathethela, ukuyakwakhela amangcwaba lokunye nje engingeke ngakubalisa.
Bekulikhefu lokusutha ngoba nanku liba sesikhathini sehlobo. Labavela emadolobheni besazi ukuthi nxa sebephindela emuva bazathwala ihlobo eligoqela amakhabe, amazambane, umumbu, amakhomane, imfe lokunye nje.
Lonyaka ngokoma kwezinto elizweni babebalutshwane abenelisileyo ukuthi bavakatshele izihlobo labangane.
Emakhaya amanengi njengeminyaka edluleyo bekulindwe ukuthi kuzabuya oZibanibanyana kodwa phinde, mhlawumbe bazwile ukuthi lezilimo zitshile ngoba indawo ezinengi insimu zisele zibomvu gebhu zalinywa, ngokutshisa kwelanga lalonyaka akuzange kumile lutho.
Inengi labantu ababelimile ihlobo abazange bake balichinse, imizi eminengi umangoye uselala eziko kumbe sebesidla kanye ngelanga ukuze balondoloze okuyimputshana abayabe belakho, kuthi lezitshebo zakhona ziyahlupha akula mibhida yendumba lenkomo ezizeleyo azisasengwa ngoba utshani abukho, funa uzibulalele amankonyane njalo labonina bacube.
Kwakube mnandi ukuthi lawe uvakatshile ubaphathele otshukela lokunye ukwazi ukuthi nxa usubuyela lawe uzasuka uphethe ihlobo, ondlubu, omumbu lokunye nje ngitsho lezithelo zeganga ezifana lomnyi, obhuzu, umkhomo lokunye esingeke sakubalisa sikuqede.
Zikhalile izalukazi ezinengi zibona abantwabazo, abazukulu lamanye amalunga emideni engabuyanga, phela bona abanaki ukuthi impilo inzima njalo nxa umuntu esiza ekhaya akumelanga athutshe elengise izandla, kumele uthi mzukwana ufikile uvela edolobheni bethi bekuhlabela inkukhu kumbe imbuzi bekwazi ukuthi lawe ubaphathele izibiliboco abazasala bezidla phose inyanga ezimbili.
Labavela khatshana emazweni aphetsheya kolwandle bebebalutshwane, okutshengisa sobala ukuthi isimo somnotho elizweni lakithi asimanga kuhle. Singabazondeli abangabuyanga ukuzosivakatshela, isimo asimanga kuhle, sekusengezelelwa layikutshisa kwelanga, lawo amakholwa amanengi abedonda ukuhamba ezindaweni lapho okwakubuthenwe khona kukhunjulwa ukufa lokuvuka kukaJesu.
Ayixabene.
