uMthunywa
Thokozile Mbedzi
ZISELE zithwele imikhono ekhanda izakhamizi zesigabeni seMkhayeni Gold Panning, eFilabusi kulandela ukuzwa ngenye indoda egwaze umkayo yambulala isola ukuthi kungani efulathele umuzi wayahlala lenye indoda.
Isehlakalo lesi senzakale ngeviki ephelileyo.
Kubikwa Mkhelifi Dube owesigabeni seMbava khonale eFilabusi ugwaze umkakhe uSibambeni okungasatholakalanga isibongo sakhe osuka eHalisupi, esigabeni seGuyu eGwanda ngesizatho sokuba umuke emzini wabo wayahlala lenye indoda kuPlot 4 Railway Block ngemva kokuba bebe lokungazwisisani enkulumeni bebanga indoda ebisizwana lomkakhe.
Ekhuluma lentatheli uMnumzana Khethani Dube uthe lokhe bebona sengathi bayaphupha ngoba abakubonileyo bekusesabeka.
“UMkhelifi lonkosikazi wakhe kukhanya baba lengxabano kubangwa enye indoda uSibambeni ayesezwana layo. USibambeni ebona sekunzima wamuka waya kuleyondoda wayalala khona.Mkhelifi wamlandela wafika balwa futhi andubana amgwaze ehlombe kunye lesandleni wabuye wambamba ngamandla wathi kababuyele emzini wabo kodwa kukhanya bathi besendleleni wabuye waphinda wamgwaza wahle wambulala,” kulandisa uMnu Dube.
Kubikwa abanye ababebone uMkhelifi esuka ehudula umkakhe ngemva kwesikhathi balandela bathi sebehambe umango ongaba yi-5km bathola isidumbu sikaSibambeni egangeni bahle bayabikela amapholisa.
Isikhulumi samapholisa esabelweni seMatabeleland South uAssistant lnspector Starnford Mguni ebuzwa ngodaba lolu uvumile wathi solufikile ehofisini yabo.
“Nxa kungaba lezingxabano ezimulini sikhuthaza abantu ukuthi babikele abaphathi bezigaba, amapholisa, izinduna lenkokheli ezingabaphathisana ekuxazululeni inkinga ngendlela elesizotha lobuntu.
“Amapholisa acela uzulu ukuba ongabe elolwazi lwalapho okulometheswacala azise amapholisa aseduzane laye,” kuphetha uInsp Mguni.
