uMthunywa
YiNtatheli kaMthunywa
ABABONA ngezomumo womkhathi abeMeteorological Services Department sebexwayise uzulu ukuthi alimuke izulu elikhulu elizayo njalo elilombane elizakwenza kube lezikhukhula endaweni ezinengi zelizwe.
Lanxa lezi kuzindaba ezimnandi kubalimi kodwa-ke kuyadingeka ukuthi uzulu aqaphele ingozi ezingabangelwa lizulu leli elilombane.
Kusitatimende esikhitshwe ngeSonto abohlangothi olubona ngezomkhathi baveze ukuthi izulu eline ngeSonto endaweni ezehlukeneyo belisedlula isilinganiso se-20mm nanko phela eGwanda eDenny’s Farm libe yi-47mm, eTsholotsho kanye leVictoria Falls libe yisilinganiso se-31mm, eNkayi libe yisilinganiso se-22mm kuthi eMasvingo libe yi-40mm.
Isitatimende lesi siveze njalo ukuba izulu leli lizaqhubeka lisina kuyonale iviki njalo kwezinye indawo kuzakuba lezulu lamatshe njalo elilomoya omkhulu.
Kumbiko lo, uzulu uxwayiswe njalo ukuba nxa izulu lisina babe sendaweni evalekileyo loba ezindlini, kukanti nxa umuntu limthole ephandle kumele aqotshame kusale phansi amazwane nje kuphela.
“Uzulu uxwayiswa ukuthi angachaphi imifula egcweleyo, kukanti kubalulekile ukuthi abantu babone ukuba uphahla lwalapho abahlala khona luqinile ngoba umoya ozayo ungaluthatha nxa lungaqinanga,” kuchaza isitatimende lesi esikhutshwe ngeSonto ntambama.
Uzulu uphinde njalo waxwayiswa ukuthi nxa kulamagodi angacina eselamachibi amanzi bawagqibele ngoba imiyane ingacina isichamisela endaweni lezi
