uMthunywa
Cornelius Luphahla
KULOMFUNDISI webandla leZinkonjane Church in Zion eliseShabula eLupane otshaywe lizulu wafa ngemva kokubanjwa encinda uluju lwemvelo lekhosikazi likamakhelwane elingumzalwane wakhe okucatshangelwa ukuthi izulu leli lathunywa yindoda yalelinina.
Isiga lesi senzakale ngoLwesihlanu kuviki ephelileyo lapho uMnumzana Lazarus Mangena otshaywe khona lizulu ethelela esivandeni somzawakhe uTymon Ncube.
UMnu Mangena kubikwa wabaleka ekhaya ngemva kokubanjwa loNkosazana Lindani Moyana umkaMnumzana Mthandazo Moyo esivandeni esiseShabula eLupane wahle wasebaleka wayacatsha kumzawakhe eChibila eBinga.
UMthunywa uxhumane loMnu Ncube ongumzawakhe kamuyi uMangena wathi uthithibele ngesiga esamehlelayo walandisa ngokutshaywa kukaMangena lizulu.
“Lokhe ngithithibele ngilapha ngoba okunjeya angikaze ngikubone sibili. Okwangimangalisayo yikuthi sasithelela sonke lomzawami sabona iyezi elincane lisiza phezulu lafika lama maqondana lathi. Sithe sesizama ukubaleka lathonta izulu ngabona kusehla inkosazana ngahle ngalala phansi. Ngithe ngivuka ngabona umzawami sesitsha selimtshayile.
“Ngemva kwalokho ngagijima ngisithi mhlawuphe uyaphila ngathola sefile ngafika ngamthela ngamanzi njengoba wayesesitsha. Konke lokhu kwenzakala ngingazi ukuthi umzawami ubebaleke emzini wakhe ngoba ebanjwe lomfazi womuntu. Ngimangele sengikuzwa sengisemzini wakhe emfeni,” kutsho uMnu Ncube.
Intatheli ikhulumisane loMnumzana Mkhokheli Dube ongumakhelwane kaMnu Mangena wathi yena ucabangela ukuthi izulu leli lalithunywe nguMnu Moyo ngoba wayehlala emsongela.
“Mina ngokubona kwami izulu elatshaya uMangena lathunywa nguMoyo ngoba ubehlala emsongela ethi njengoba wabaleka uzaphenduka sekhangele phezulu esebhokisini. Lokhu sokugcwalisekile nanku uphenduke esengofileyo, khathesi simbekile.
“Ngalokhu-ke noma ngingabotshiswa mina ngiyakukhuluma lokhu engikutshoyo ngoba uMoyo wakukhuluma lami ngilalele sibili ngakho ngizwa ubuhlungu ngokufa komzukulu wami,” kutsho uMnu Dube.
UNkosazana Betty Mangena ongudadewabo kamuyi uthe uzwa ubuhlungu kakhulu ngokufa kukamnewabo njalo ubulewe nguMoyo.
“Mina ngizwa ubuhlungu kakhulu ngokufa komnewethu njalo ngiyazi ukuthi ubulewe nguMoyo ngoba lakithi uke wabuya kuviki ephelileyo wathi umnewethu uzaphenduka sefile. Kuthe kungakapheli ngitsho leviki sezwa kuthiwa umnewethu setshaywe lizulu wafa. Lakanye wabuya sefile njengokutsho kukaMoyo ngakho ngeke sicabangele omunye umuntu ngaphandle kwakhe,” kutsho uNkszn Mangena.
UMnu Moyo ebuzwa ngale indaba uthe yena kayisuye otshayise uMangena ngezulu, yena wayekhulunyiswa yikuzwa ubuhlungu.
“Mina kayisimi engitshayise uMangena ngezulu, abantu bayangigcona kuphela ngoba ngangikhuluma kubi ngisizwa ubuhlungu ngemva ngesenzo angenza sona. Ngenxa yokuthi ngathi ngemva kokukhuluma lokhu wehlelwa yisilingo yikho nje sokungani ngilesandla ekufeni kwakhe kodwa ngingazi lutho,” kuphetha uMnu Moyo.
