uMthunywa
KULESITSHO esithi inyembezi zendoda ziwela esifubeni, ngoba indoda noma isizwe ubuhlungu obungakanani akumelanga iklabalale okosane oluhlatshwe ngameva esinga. Indoda ifela ngaphakathi.
Amadoda indlela adalwa ngayo itshiyene leyabesifazane. Ngikhumbula enye indoda engake ngasebenza yayihlala ibuya emsebenzini ilemvivinya, noma nje wayenatha wayengasi yena muntu othanda ukulwa, kwelinye ilanga wabuya ilihlo lilombala womchilo wamakhosikazi.
Noma nje wayemdala kulami ngaqunga isibindi ngambuza ukuthi wenze njani waqala ngokumoyizela kancane engakangiphenduli, wacina eyihluba indlubu ekhasini engitshela ukuthi utshaywe ngunkosikazi wakhe bebanga ukuthi kamsuthisi kwezocansi ngoba kwesinye isikhathi uyabe ephuze kwaze kweqa.
Uthe ekhumula iyembe engitshengisa amanxeba amanye eseze azipholela esesaba ukuya esibhedlela ngoba ethi omongikazi bazamhleka ukuthi yindoda enjani etshaywa ngunkosikazi wayo aze ayiphoqelele kwezocansi noma yena esekhathele.
Kwakuthi mhla inyanga ephelile kuholiwe umkakhe nguye owahamba ebhanga athathe yonke imali, angatshiyi lutho ngitsho leyokugada esiya msebenzini athi ukhulile uzahlanganisa athole eyokugada.
Ngelinye ilanga babembhaxabule ngemvubu ngaze ngatshela omunye umngane wami olipholisa lakanye wafika endlini yabo efuna ukubakwazi ukuthi ngabe baphila kanjani kodwa indoda yiyo eyahle yathi yena lomkakhe wakhe baziphilela kamnandi njalo abalankinga bayathandana wathi ebuzwa ukuthi kungani ilihlo liyibubende wathi ephendula umpholisa wayewile edakiwe izolo.
Noma umpholisa esezama ukuthi aphenyisise ngelihlo lesipholisa wemba phansi wamangelithi abantu abafuni ukubona abantu abathandanayo.
Kwesinye isikhathi wayexotshwa ebhawa kuthi ilanga selitshonile kahambe ayepheka ikhosikazi lakhe lisale liphuza lamanye amadoda baze bamphelekezele bayemtshiya egedini sekuze kutshaye ihola letshumu ebusuku.
Manengi amadoda azifica ekulesi simo kodwa balutshwane abaphumela egcekeni bakhulume ukuthi bayahlukuluzwa ngomkabo besesaba ukuhlekwa.
Phela indoda etshaywa likhosikazi layo abantu kuvamile ukuthi bangamenzi muntu ngoba bethi uyabe ungokuyindojelana.
Amanye amakhosikazi aze akutshengisele noma kulabantu bemzini kumbe izihlobo ukuthi kukhala esikabani isicathulo kulelo khaya uthole indoda isinunubele isemzini wayo.
Nxa usitsha hamba uyetshela izihlobo kumbe amapholisa kumbe umfundisi ungafeli ngaphakathi kuyatholakala kusempilweni, funa aze akukhumule amazinyo kumbe akuxofe ilihlo uguge suyisilima.Ayixabene.
