uMthunywa
Johas Moyo
BEKUNGABIZWA ozwayo kumkhosi wokuvulwa kweviki yokulondolozwa kanye lokuqhutshwa kwezamasiko obusesiqintini sakoGodlwayo eFilabusi.
Umkhosi lo wenziwe ngoMgqibelo kuviki ephelileyo eGodlwayo Cultural Centre lapho uMsekeli kaMongameli welizwe uKhomuredi Phelekezela Mphoko ezinye inkokheli zikaHulumende, kanye lenkonkheli zomdabu ebezithe gwaqa khona.
Uzulu ukhuthazwe ukuthi avuselele amasiko kanye lendimi zakuleli ngenhloso yokuthuthukisa ezamasiko.
Ikhuluma kulo umkhosi induna yakulesisiqinti uMnumzana Vezi Maduna Mafu uchaze ukuthi abantu kabaqakathekise amasiko abo bengalandeli amasiko emzini.
“Ngikhuthaza abantu ikakhulu intsha ukuba bengaze badela amasiko akibo balandele awamanye amazwe ngoba isizwe lesizwe silemikhuba lamasiko aso.
“Ngalokhu kuqakathekile ukuthi umuntu azigqaje ngobuzwe bakhe ngoba nxa siqakathekisa amasiko emzini kutsho ukuthi siyabe sisola ubuyithi bethu.
“Ontanga ikakhulu yibo asebetshabalalisa amasiko akoMthwakazi ngoba sebeziphatha ngendlela yezinye izizwe, kasekho olaziyo isiko. Lokhu kubi kakhulu ngoba babulala ikusasa likaMthwakazi njengoba kuyibo abazali bakusasa.
Ngalokhu ngikhuthaza uzulu wonke nje ukuthi avuselele amasiko ngoba yiwo aphethe ubuzwe bethu,” kutsho induna uMaduna.
UMsekeli kaMongameli welizwe uKhmrd Mphoko ekhuluma kulo umkhosi uveze ukuthi ukungalondolozwa kwamasiko yikho osokudale ukungahloniphi kubontanga, abanye sebeze bethethisa abantu abadala.
“NjengoHulumende wakuleli sikhuthaza ontanga ukuthi baqakathekise njalo balandele amasiko akuleli ukuze bengalahlekelwa yibuzwe babo. Ngikhuluma nje inengi labontanga bakulezinsuku kabaselanhlonipho ngenxa yokulandela amasiko ezinye izizwe.
“Kuhle ukuthi ontanga baguquke balandele amasiko abo ukuze bangafundisi abantwababo imfundiso embi,” kutsho uKhmrd Mphoko.
UKhmrd Mphoko uphethe ngokukhuthaza abadala ukuthi bafundise intsha ngezamasiko ukuze insika yabansundu ingatshabalali.
