uMthunywa
Nkosilathi Sibanda
ABALANDELI bomdlalo wenguqu yakuleli kusasa bazathi ukuthiya indlebe belinde isimemezelo samabizo abadlali ababonakale bedlale ukwedlula abanye kuligi yeCastle Lager.
Ingcitshi kwezebhola likanobhutshuzwayo ezigoqela intatheli, abaqeqetshi labokaputeni bamathimu bavota ngoLwesihlanu ekuseni. Uhlelo lokuvota lonyaka lutshintshiwe nanko inhlanganiso yeCastle Lager ithe abadlali bazakhethwa ebulenjini, endaweni yokuthi kuhlanganwe mathupha.
Amavoti la enziwa ngemva kwesikhathi kungavotwa ngenxa yokumiswa kwemidlalo yenguqu kubangelwa ngumkhuhlane weCovid-19. Umdlali owacina eyingcitshi kulabo bonke kukhalenda kwakunguJoel Ngodzo ngesizini ka2019.
Kumaqembu wonke ayisitshiya galombili ancintise kuligi yeCastle Lager, bonke abadlali balethuba lokukhethwa. Okuzayehlukanisa abadlali laba yikudlala abakwenzileyo kuphela.
Amaqembu amakhulu aqede ephezulu kungalane yeCastle Lager okukhangelelwe ukuthi kuphume khona abadlali abalisa iFC Platinum, Chicken Inn, Highlanders leCaps United.
Abalandeli beBosso kumdlalo wabo le FC Platinum eBarbourfield Stadium ngeSonto
Umgadli weCaps United uWilliam Manondo ulesicoco sakhe esingaphikiswayo phela ehlohle amabhola amanengi ukwedlula bonke. UManondo, osebizwa ngelithi “Manondoskwi” uhlohle amabhola angu-15.
Umdlali ongabe nguye yedwa kuleliqembu ozangena kukhalenda.
Kuntshantshu zeligi kuloWalter Musona oqede isizini ehlohle amabhola alitshumi lantathu. Omunye wakhe kuqembu elifanayo, uThandolwenkosi Ngwenya usehlelweni kunye loWallace Magalane unozinti wabo.
Amahlolanyama, iHighlanders eqede ikunombolo yesihlanu ilomdlali wayo othabise abanengi ngethalenta lakhe uDivine Mhindirira njalo akukhohlwakalanga uLynoth Chikuhwa. Umdlali lo ukwenze kwabalula ukuthi leliqembu liphethe isizini likunombolo ehloniphekayo.
Komakhelwane iChicken Inn, kukhangelelwe ukuthi kukhethwe uBrian Muza, uItai Mabunu loDonovan Bernard.
Iqembu leBlack Rhinos lingaba lenhlanhla kukhethwe uFarai Banda lo-Eli Ilanga.
Kubafana beqembu leWhaWha kungena uCalum English-Brown, Blessing Majarira of Herentals, Black Rhinos’ Eli Ilunga, loba isivalelisile, iBulawayo City izathola intokozo ngokukhethwa komdlali wayo uMelikhaya Ncube.
Iqembu leBulawayo City
Ngemva kokuvotwa kwangoLwesihlanu, inhlanganiso yePSL ibike ukuba izakwenza idili lokunikeza abadlali laba izicoco zabo.
Kuleli idili kuzavezwa umqeqetshi owedlule bonke uNorman Mapeza lomdlali osakhulayo.
