uMthunywa
Ethel Ncube
SITSHAQISE amalunga omphakathi isehlakalo sokutholakala komntwana welokitshini leMkoba 6 eGweru oleminyaka eyisificaminwe mibili endenda kwenye indawo yokubhukutsha kulandela ukuqeda insuku ezimbalwa engabonakali.
Kuvele ukuba isidumbu somfana lo, sitholakale mhlaka 10 Mfumfu sindenda kwenye indawo yokubhukutsha (swimming pool) ngemva kokuqeda insuku ezimbili edingwa.
Isikhulumi samapholisa eNkabazwe uInspector Emmanuel Mahoko uthe bamukele umbiko womntwana oleminyaka eyisikhombisa otholakale egalule kwenye indawo yokubhukutsha.
“Isisebenzi esikhangela indawo yokubhukutsha yiso esaqala ukubona isidumbu somntwana lo sindenda emanzini.
“Abazali bomntwana lo babehambise umbiko emapholiseni wokuba umntanabo ongumfana oleminyaka eyisikhombisa kabonakali,” kuchaza uInsp Mahoko.
Kubikwa isidumbu sathwalela esibhedlela seGweru ukuze siyohlolwa imbangela yokufa.
UInsp Mahoko uphethe ngokuxwayisa abazali ukuthi bananzelele abantwana zikhathi zonke.
“Sikhuthaza abazali ukuthi bananzelele abantwana ngaso sonke isikhathi lapho abadlala khona bengabekeli bedlala bengabakhangeli,” kuphetha uIns Mahoko.