uMthunywa
KUSOLWA inkinga kavayi citshi wamagetsi ngokulahleka kwemiphefumulo yezelamani zeMyeni eMaphaya, eJozini ngoLwesithathu. Izidumbu zikaMelokuhle Myeni (7), Khethokuhle Myeni (6) kanye loLethokuhle Myeni (6) zitholakale endlini yangakibo elamakamelo angu-12, ngehola lesithathu emathathakusa ngoLwesihlanu.
Intatheli ikhulume loMnumzana Menzi Myeni uyise walezi zelamani othe ube engekho ngesikhathi kwenzeka lesi sigameko.
Uthe ube esemtholampilo osedolobheni laseJozini, ephuthumise ingoduso yakhe engunina wabafi ngoba inesifo sofuba.
“Kuthe ngezikhathi zantambama ngoLwesine kwahamba amagetsi ,ezabuya entathakusa. Ngokutsho komuntu obekhona ekhaya, uthi uzwe into eqhumayo kodwa wangacabangeli ukuthi kungabe kuyikutsha kwendlu. Ngibuzwile ubuhlungu ngoba izingane zami ngizithole zitshonele egunjini elilodwa. Ngisola ukuthi uLetho uhlaselwe wumlilo waphuthuma egunjini okulala kulona abafowabo.
Abafanyana bona ngisola ukuthi babulawe ukuhitshwa yintuthu ngoba kabalimalanga kakhulu,” kusho uMnu Myeni.
Uqhubeke wathi basola amagetsi ngalesi sehlakalo. “Angikungabazi ukuthi izingane zami zibulawe yi-loadshedding. Ngesikhathi kuhamba amagetsi kasiwisanga lutho okulokwenzeka ukuthi kuthe uma usubuya kwaba lokutsha kwezinto ezithile endlini. Amagetsi adale wonke lumonakalo ngawufakelwa yinkampani yako-Eskom. Ngizwa ubuhlungu obungachazeki ngenxa yalesi simo. Isimo simunyu kangangokuba ngitsho lomama wazo usesimweni esinzima kakhulu. Lesi simo simlimaze kakhulu,” kutsho uMnu Myeni.
Ukhansela wakulindawo uMnu Nhlanhla Gumbi uhambe emazwini kaMnu Myeni. “Ngithole umbiko ngezikhathi zekuseni. Ngokwemibiko lezinsolo ezikhona, sisola ukucitsha kwamagetsi okuhlasele lapha elizweni.
“Lumdeni ulamagetsi aqondileyo njengeminye imizi eyakhiwe endaweni. Ngiyafisa ukuba ngixwayise amalunga omphakathi ukuba aqaphele ngaso sonke isikhathi sokuhamba kwamagetsi ukuze uhlale uphephile. Sizwa ubuhlungu ngokuthi lamuhla sikhuluma ngalolu daba nje sekulezidumbu eziphumileyo,” kusho uMnu Gumbi.-Isolezwe
