uMthunywa
Cornelius Luphahla
BEKUSINDWE ngobethole kuguga othandayo emkhosini wokukhunjulwa kwebutho lenkosi uLobhengula eleMbizo obukhona eGadade, eNtabazinduna ngoMgqibelo kuviki ephelileyo lapho obekungasibantu kuyinyelane.
Umkhosi lo ubujonge ukukhumbula ibutho lenkosi uLobhengula elaphelela eGadade ngemva kokwehlulwa libutho likaJameson elalisebenzisa imibhobho okwadala ukuthi inkosi itshiye isigodlo sayo inyamalale.
Ikhuluma emkhosini lo induna yakule indawo uMnumzana Nhlanhlayamangwe Ndiweni uveze ukuthi uzwa ejabula kakhulu ngokuphatheka kwabantu okuveza ukuvuseleleka kwamasiko.
“Ngizwa ngijabula kakhulu ngokuphatheka kwabantu emkhosini wokukhunjulwa kwebutho lenkosi uLobhengula.
Lokhu kuzadala ukuvuselelwa kwamasiko alapha koMthwakazi ngoba yiwo umkhosi okukhuthazwa khona kakhulu ngezamasiko.
“Okungijabulisa kakhulu yikuthi intsha layo ikhona okuyiyo insika yesizwe ibuye njalo ibe zinhloko zakusasa.
Ngilethemba lokuthi eminyakeni ezayo abantu bazaba banengi okwedlula lapha,” kutsho induna uNdiweni.
Induna uNdiweni iqhubekele phambili yathi umkhosi lo uzaphakama kakhu nxa sokulenkosi koMthwakazi.
“Ngilethemba lokuthi eminyakeni ezayo umkhosi lo uzaba lodumo uphakame ngamandla ngoba kuzabe sokulenkosi ewuholayo. Noma nje kungakavezwa ukuthi ithole lizabekwa nini kodwa mhla libekiwe isizwe sizavuka lamasiko aphakame,” kutsho induna uNdiweni.
Induna uGumede edabuka kweleSouth Africa ikhuluma emkhosini lo ithe kuqakathekile ukuthi isizwe sibe lenkosi ngoba amasiko avuswa yinkosi.
“Kuqakathekile ukuthi isizwe sibe lenkosi ngoba yiyo eqhuba eminye imikhosi iqhutshwa yinkosi kuphela. Imikhosi le igoqela inxwala eyiyo evulwa yinkosi kuphela yikho nje lapha ungagujwa umkhosi lo.
“Nxa kulenkosi intsha kulula ukuthi ifunde amasiko akwabo ngoba ilizwi lenkosi liyezwakala njalo lingumthunzi wesizwe. Okunye njalo kuqakathekile ukuthi intsha iphatheke emikhosini yezamasiko ngoba yiyo ezakhokhela isizwe kusasa,” kuphetha induna uGumede.
