uMthunywa
Buhlebenkosi Gaule
IDOLOBHO leFolosi ngeviki yokucina kunyanga kaNtulikazi lizabe linyakazela kumhlangano weAssociation of Education Assessment in Africa lapho okuzabe kuthe gwaqa ikhansili yakuleli ebona ngemihloliso eyeZimsec kanye lengcitshi kwezemfundo ezivela emazweni aseAfrica ukuze kuhlolisiswe ngezemfundo kusizwekazi seAfrica.
Isikhulumi seZimsec uNkosazana Nicky Dhlamini uthe ikhansili le isilindele izethekeli ezibona ngezemfundo emazweni abalisa iSouth Africa, Malawi, Zambia kanye leTanzania.
Umhlangano wokuhlolwa kwezifundo eAfrica uzakwenzelwa eElephant Hills kusukela mhlaka 25 kusiya ku-29 Ntulikazi kuwonalo umnyaka ukuze baphume lendlela zokufundisa ezingcono njalo ezizaphakamisa imfundo yeAfrica.
“Kumhlangano lo sikhangelele ukuthi bonke ababona ngezemfundo emazweni eAfrica babe khona njalo phakathi kwabo kuzabe kulababalisi, abaphathi bezikolo, abafundi ukuze kube lemibono etshiyeneyo ezaphathisa ukuthi kuguqulwe ezinye izinto ukuze kuthuthukiswe imfundo yesizwekazi seAfrica,” kutsho uNkszn Dhlamini.
Uqhubekele phambili uNkszn Dhlamini esithi indikimba yomhlangano walonyaka ithi, “Promoting Holistic Development through Innovative Educational Assessment Initiatives,” lokhu kuchaza ukuba izifundo zeAfrica kumele zisekele ukuthuthuka kwe-Africa ngokuphatheka kumfundiso ephathelane lezokuthuthukisa iAfrica kungabe kuyizifundo zemisebenzi yezandla.
UNkszn Dhlamini uphethe ngokuchasisa ukuba ikhansili yeZimsec iyenza konke okusemandleni ayo ukuthi abafundi bemfundo yaphezulu laphansi bathole imfundo elohlonzi yikho nje iphatheka kumhlangano ofana lalo.
