uMthunywa
Bongani Ndlovu
OWAYENGUMSEKELI kaMongameli welizwe umuyi uKhomuredi Landa John Nkomo usechazwe njengomkokheli oqotho njalo owayezimisele kwezombangazwe ngesikhathi ilizwe linanza iminyaka engu-10 kusukela wedlula emhlabeni.
UDokotela Landa John Nkomo wabhubha ngemva kokuphathwa yisifo semvukuzane mhlaka 17 Zibandlela 2013 esibhedlela seSt Annes eseleminyaka yokuzalwa engu-79.
UNobhala omkhulu kaMongameli kanye leKhabhinethi uDokotela Misheck Sibanda uthe umuyi wayengumakhi wesizwe owayekhokhela ngendlela efana xathu leyombuso weSecond Republic eqonqosela ukwakha ilizwe.
“UKhmrd Nkomo wasebenzela uluntu lweZimbabwe kanye loHulumende kuzikhundla ezitshiyeneyo kusukela ngo1980 kusiya kulanga lakhe lokutshiya umhlaba, mhlaka 17 Zibandlela 2013.
“UDkt Nkomo wayekholwa emandleni abantu okuzihlelela indlela abafuna ikusasa labo libe yilo kuhambisana lombono weSecond Republic owokwakha ilizwe “sitina ngasitina, litshe ngalitshe kungekho osalela emuva njalo kungelandawo esalela emuva,” kutsho uDk Sibanda.
Zanu-PF
Ukhuthaze abantu ukuthi balandele lokhu okwakusenziwa nguKhmrd Nkomo ngesikhathi ilizwe likhangelele ukuya kukhetho lonyaka.
“Njengoba inkokheli zeSecond Republic zihlala ziqonqosela ngokuthula ngesikhathi sikhangelele ukuya kukhetho siyakhunjuzwa sonke ukuthi ‘ukuthula kuqala ngami, ukuthula kuqala ngawe njalo ‘ukuthula kuqala ngathi sonke,” kutsho uDkt Sibanda.
“Umoya kamuyi uMsekeli kaMongameli Khmrd Landa John Nkomo mawuqhubeke ulele ngokuthula. “
UMphathintambo obona ngokwenzakala esabelweni seMatabeleland North uRichard Moyo uthe uKhmrd Nkomo wayezimisele ngendaba zokubuyisana kanye lokuthula.
Uthe umuyi wasebenza nzima ukuze kuqalwe ukukhangelwa indaba zokukhuthaza ezokubuyisana kanye lokubekezelelana.
“UKhmrd Nkomo wayengumkhokheli owadlala indima enkulu ekuthuthukiseni ilizwe kanye lokukhuthaza ukubambana. Wayemqoka njalo ekusayinweni kweUnity Accord ka 22 Mpalakazi phakathi kweZanu lePF-Zapu.
UMphathintambo Moyo uphinde wathi uKhmrd Nkomo wayehlanganisa abantu kanye lokubakhuthaza ukuba babambane.
Uthe imbali yokubuyisana lokubekezelelana yikho ilizwe elizahlala limkhumbula ngakho uKhmrd Nkomo.
UKhmrd Nkomo wabekwa eNational Heroes Acre esigodlweni seHarare. Umuyi wake waba ngumbalisi, umkhululi kanye losopholithiki.
National-Heroes-acre-zimbabwe
Umuyi wayezimisele ekukhululeni elizwe ngesikhathi sempi yenkululeko ekuleli lakweleZambia esebenza enguSecretary of Administration kubandla lePF-Zapu.
Wadlala indima enkulu njalo ngesikhathi seLancaster House Conference eyacina iholela uzibuse kuleli njalo wayezimisele ukusebenzela ilizwe okwempilo yakhe yonke.
UKmrd Nkomo wazalwa esigabeni seTsholotsho esasisaziwa ngelokuthi Gwai Reserve kudala esabelweni seMatabeleland North mhlaka 22 Ncwabakazi 1934.
Kulandela ukusweleka kukaDokotela Joseph Wilfred Msika ngoNcwabakazi 2009, uDkt Nkomo wakhethwa ukuba abenguye uSecond Secretary kanye lomsekeli kaMongameli weZanu PF kumhlangano we Fifth National People’s Congress.
Wagcotshwa ukuba abe ngumsekeli kaMongameli welizwe leZimbabwe kunyanga kaMpalakazi ngo2009 njalo waqhubeka ekhokhela inhlanganiso yokubuyisana eye National Healing Reconciliation and Intergration.
