uMthunywa
YiNtatheli kaMthunywa
ABATHENGISA impahla etshiyeneyo eFort 11 Flea Market enzikini yedolobho lakoBulawayo bakhathazekile ngabesifazana ababili abahlala bevalelene emoteni okwenza bacabangele ukuthi bangabe beqhuba amabhizimusi angekho emthethweni kuthi abanye labo bathi amanina la angabe elobudlelwano obungalunganga.
Kucatshangelwa ukuba uTsitsi Siziba oleminyaka yokuzalwa engu-28 loNonhlanhla okungasatholakalanga isibongo sakhe kanye leminyaka yakhe yokuzalwa benza imithanithani yabo emoteni le emnyama kodwa akucaci ukuthi bhizimusi bani abayiqhubayo kule imota.
UMthunywa uxoxisane lomunye wabathengisa kule i-flea market ongathandanga ukuqanjwa ngegama kodwa ongowesilisa osekhulile otshengisele ukukhathazeka ngokwenzakala phakathi kwemota le.
“Eqinisweni ukuthi kwenzakalani phakathi kwemota le emnyama kangikwazi kodwa ngizwa abanye besithi amanina la athengisa utshwala.
“Kwezinye izikhathi ngangibone abantu bephuma bephethe utshwala phakathi kwemota le,” kutsho umfakazi lo.
Iphephandaba likazulu liphinde njalo laxoxisana lomunye othengisa kule indawo waveza ukuthi kukhona okutshaya amanzi ngemota yalaba ababili ngoba imnyama njalo lamafasitela ayo amnyama okwenza kungakhanyi okwenzakala phakathi.
“Kayisimi ngedwa engisola ukuziphatha kwalaba ababili kodwa bonke abantu abathengisa lapha bahlala bekhuluma ngakho,” kuveza umfakazi lo.
UMthunywa wenelise njalo ukukhulumisana lomunye umfakazi othande ukuvezwa ngokuthi nguNkosazana Makoni wathi yena wayengumngane womunye wezitabane lezi behlukaniswa yikuthi wayengasayizwisisi indlela ayemphulula ngayo.
“Mina ngake ngaba ngumngane womunye walamanina kodwa ngamangala ngoba sasisithi nxa sesisemoteni ngimbone esengibambabamba. Ekuqaliseni ngangithi uyadlala ngasenginanzelela ukuthi mhlawumbe usebona umfazi kimi.
“Ngathi ngibona sekuphinda isithathu ngamtshela ukuthi kangikuthandi lokhu angenza khona wazonda kwahle kwaba yikho ukuphela kobungane bethu,” kutsho uNkszn Makoni.
Omunye njalo umfakazi ongathandanga ukuqanjwa uthe banengi abacabangela ukuthi amanina la angabe eyizitabane. Wengezelela ngokuthi yena wake wabafica bethandelene okwenyoka phakathi kwemota yabo emnyama.
“Mina ngake ngathi ngisiyathenga utshwala ngemva kokuba sengizwe ukuthi bale-shebeen, ngathola bemumuzana okwangenza ngayabuza abanye ukuthi kungabe kusitshoni lokhu.
“Engababuzayo bathi lo olomzimba omkhulu nguye ongathi yindoda phakathi kwalaba ababili,” kutsho umfakazi lo ongathandanga ukuqanjwa.
Ebuzwa ngale indaba uNkszn Tsitsi uchaze ukuthi indaba enjalo kayazi abantu bangcolisa ibizo lakhe kuphela.
“Indaba enjalo kangiyazi mina abantu bayangizonda, ngokubona kwami abalitshele khonokho ngabantu abafuna ngingathuthuki kubhizimusi yami ye-flea market. Ngikhuluma nje abanye ngibabophisile ngoba besala ukungibhadala imali yami khathesi ngivela emthethwandaba.
“Ukwenda kangendanga sibili kodwa nxa usola ukuthi angisisitabani khetha omfunayo ungene laye emoteni lapha uzizwele,” kutsho uNkszn Siziba.
UNkszn Nonhlanhla uchaze ukuthi kawazi umlandu awetheswayo ngoba yena ulomntwana.
“Mina ngendile umkami useGoli njalo ngilomntwana. Lokhu okokuthi ngiyisitabane kangikwazi,” kuphetha uNonhlanhla.
Ababili laba bebuzwa ngokuthi bathengisa utshwala emoteni bathe bathengisa imitshana esetshenziswa endlini.
