uMthunywa
Cornelius Luphahla
AZILANKANI izakhamizi zesigabeni seHalali, eMaphisa ngemva kokukhitshwa kukandofa olikhiwa esikolo seHalali Primary kanye leWhitewater High School, obesethwalise nzima abafundi ngokubatshaya kanye lokuya emacansini lababalisi.
Imbedumehlwana le yenzakale kumaviki amabili edluleyo lapho otsikamutanda abakhuphe undofa olejwabu lekhiwa endlini yomunye umbalisi, okubikwa ubesekhathazile ngokulala lababalisi kanye lokubathathela ukudla kwabo, uMthunywa ukuzwile lokhu.
Intatheli ikhulumisane lesinye isakhamuzi sakule indawo uNkosikazi Simelinkosi Ndlovu wachaza ukuthi wazibonela ngawakhe amehlo undofa lo obeseze wavalisa isikolo.
“Undofa mina ngazibonela ngawami la. Otsikamutanda bafika bachela isikolo sonke basuka lapho bangena kwenye indlu yababalisi baphuma bephethe umuntu omncane ofana lekhiwa bathi nguye undofa obesehluphile esikolo,” kutsho uNkkz Ndlovu.
UMnumzana Sipho Sibanda esinye isakhamuzi sakule indawo ubikele njalo intatheli ukuba otsikamutanda laba bamthatha bayamtshisa undofa lo kodwa abazange baveze ukuthi ngokabani.
“Otsikamutanda laba bamtshisa undofa lo bathi ngeke babikele izakhamizi ukuthi ngokabani ngoba kabafuni kuxabanisa abantu. Babuya njalo bathi sebelungisile ukuthi kungasangeni ndofa kulesisikolo,” kutsho uMnu Sibanda.
Omunye wababalisi bakulesisikolo ongathandanga ukubethwa ngegama ubikele intatheli ukuthi balokujabula okukhulu ngoba besebekhathele ngalundofa.
“Mina ngiyathaba kakhulu ngokukhitshwa kukandofa lo ngoba besesitshile ngaye. Bekuthi nxa uvuka ekuseni uzibone ugqoke isikhindi somunye umbalisi wesifazana nxa ungowesilisa. Kwesinye isikhathi wawuthola ukudla kwakho kungasekho endlini ekuseni. Abanye bethu basebefisa ukutshintshwa bayefundisa kwezinye izikolo bebalekela undofa lo,” kutsho umbalisi lo.
Induna yakule indawo uMalaki Masuku ivumile ukuthi kwakhitshwa undofa kulesisikolo.
“Kuliqiniso sibili ukuthi kwakhitshwa undofa eHalale owayesehluphile ngokutshaya abantwana besikolo ehlupha kanye lababalisi. Yimi njalo engadinga otsikamutanda laba ngoba ngibona ukuthi ababalisi labantwana besikolo sebethwele nzima,” kutsho induna uMasuku.
Umsekeli kaMqondisi wezemfundo esabelweni seMatabeleland South uNkosazana Samukeliso Dlamini uchaze ukuthi bebengakayizwa indaba le.
“Besingakayizwa indaba yokukhitshwa kukandofa lo ngakho sisazoyidingisisa ukuze sizwe ukuthi kwahamba njani,” kuphetha uNkszn Dlamini.
