uMthunywa
Ethel Ncube
ZISELE zingelamathe izakhamizi zeNdimimbili eLupane kulandelwa ukukhitshwa kwenyoka okukholwa ukuba ibiginya izulu endaweni le licine lingasani.
Iphephandaba likazulu lizwe ukuthi inyoka le ibilemibala emithathu, ibibonakala egangeni kodwa izakhamizi zingazi ukuthi ilomnikazi.
Izakhamizi ezixoxe lephephandaba likazulu ziveze ukuthi zabikelwa ngosiyazi ukuthi inyoka le yiyo ebibangela ukuthi izulu lingani esigabeni leso ngoba ibihle iliginye.
Intatheli ixhumane lesinye isakhamuzi sakule indawo uNkosikazi Sithembile Mpofu oveze ukuthi kulenyoka eyakhitshwayo yaqanjwa lokuthi ngekabani.
“Inyoka le ibimangalisa ngoba ibibonakala ngesikhathi sezulu kuphela. Ngesikhathi sidinga amakhowa egangeni besiyibona iphenduka imbala yayo ihlala ndawonye inganyikinyeki abantu besesaba ukuyibulala ngobukhulu bayo.
“Kuthe ngelinye ilanga usobhuku wabiza abantu ethi njengoba izulu lingani akudingwe osiyazi bahlanze indawo le lakanye babuya bevela eBinga.
“Osiyazi labo basilaya ukuthi siyethatha imithi yonke esilayo emakhaya kodwa umnikazi wenyoka le wathi ngeke enelise ukukuthwala,” kulandisa uNkkz Mpofu.
Uqhubekele phambili echaza ukuthi inyoka le yalandwa egangeni.
“Sangena igusu sikhokhelwa ngumnikazi wafika lapho esasisikha khona amakhowa watshaya ukhwelo yabuya abantu bethuka wayikhombela wathi nanso, lami isingihlupha ayisatheleli kuhle emasimini.
“Isitshiswa yeqa yayaphezulu yangathi iyaphapha andubana idubuke njengombhobho yasisifa,” kuchaza uNkkz Mpofu.
Ekhuluma lentatheli uMnumzana Mthabeleni Ndlovu uveze ukuthi umgombho watshiswa sibili lomnikazi laye wavuma.
“Umnikazi wenyoka le wabikela osiyazi ukuthi ayisamenzeli kuhle siginya izulu iligcine ingatheleli emasimini njalo ayisamlaleli yikho esefuna ibulawe. Ekutshisweni lapha yatshiswa nzima itshinga iphakamisa ikhanda ifuna ukuthandela enye inyanga. Lokhe yakhitshwayo izulu selike lana kukanti besesihlezi singabendlala kuphela,” kutsho uMnu Ndlovu.
Intatheli ixhumane lalowo ocatshangelwa ukuthi ngumnikazi womgobho uMnumzana Leviot Sibanda othe yena kazi lutho ngayo.
“Bayangunguna bethi ngeyami angazi ukuthi bakuthethe ngaphi. Mina ngancedisa ukubatshengisa ukuthi ihlala ngaphi njalo ibizwa njani, okunengi lokhu angikwazi,” kulandisa uMnu Sibanda.
Intatheli ibuye yakhulumisana losobhuku wakule indawo uMnumzana Velani Donga ochaze ukuthi kulomgobho owatshiswayo.
“Inyoka le yatshiswa kodwa okwamangalisayo yikuthi esinye isakhamuzi siyakwazi ukuthi nxa kumele ivele masinyane ibizwa njani lakanye kwenzakala lokho. Izulu selizakuna kungelamuntu ophambanisayo,” kuphetha uSobhuku uDonga.
