uMthunywa
YiNtatheli kaMthunywa
IZAKHAMIZI zeDombolidenje eBeitbridge zisele ziphethe izibindi ngezandla ngemva kokuba kuvuke umsindo phakathi kwamadoda amabili omunye wacina etshonile ngemva kokugwazwa nge-okapi ngesikhathi befolele ukuhola ukudla ngeviki ephelileyo.
Kubikwa lokhu kwenzakale nje abantu benganakaneli nanko phela bebelande ukuzahola ukudla kanti ababuzanga elangeni.
Ngokutsho kwalabo akade bekhona ngesikhathi kusenzakala lesisehlakalo esilusizi amadoda la kukhanya abelokungezwani okungazange kuvele ngesikhathi esilwa. Kubikwa abantu babone uClement Mazibeli oleminyaka engu- 24 yokuzalwa njalo edabuka esigabeni sakoChochi edobha ilitshe walivuthela esiphaqeni sika-Elias okungasatholakalanga isibongo sakhe. Abantu bathe besamangele enye njalo indoda uDecent Mleya oleminyaka engu-28 yokuzalwa osuka esigabeni senduna uSitaudze yahwatsha i-okapi esikhwameni yagwaza u-Elias ehlombe okubangele ukuthi acine esifa.
Ekhuluma lentatheli kaMthunywa uMnumzana Tommy Dube omunye walabo abakade bezohola ukudla ngesikhathi kusenzakala lesi sehlakalo uthe akala mathe ngalokhu akubonayo.
“Ngilapha lalamuhla angilankani ngesehlakalo seviki ephelileyo. Okuyisimanga yikuthi abantu laba bebengabangane, manje ukuthi baze bafike kusigaba sokubulalana kuhambe njani vele lathi asikwazi.
“Lokhe sibuzana nje ukuthi bekubangwani sibi sibili. Okunye okusimangalisileyo yikuthi abantu bahlasele umuntu bambulala phakathi kwabantu libalele nje.
“U-Clement udobhe imbokodo watshaya Elias esiphaqeni, uDecent wakhipha ingqamu esikhwameni wamhlaba ngayo emahlombe igazi lagcwala yonke indawo kwangani sokuhlinzwe inkomo. Lokhu kusethusile kakhulu njalo kwenzakale phambi kwabantu abanengi nanko phela wonke umuntu ubethe gwaqa lapha ngoba ezolanda ukuzahola ukudla,” kutsho uMnu Dube.
UMnu Dube uqhubekele phambili wathi umfowabo kaElias esebona umnawakhe eselimele uhle wamthwala ngenqola wamusa emapholiseni lapho abafike bamusa eZezani Clinic kwathi abekilinika labo bamedlulisela esibhedlela seBeitbridge kodwa ngokuswelakala kwenhlanhla wabhubha ngemva kwensuku ezimbili.
UNkosazana Percy Moyo omunye walabo ababekhona ngelanga lesehlakalo lesi uveze ukuthi okwenzakalayo kwabatshiya behlukuluzekile emoyeni.
“Lokhe ngisevalweni ngoba ngihlala ngikuzwela endaweni ezikhatshana ukuthi abantu bayagwazwana lamuhla ngize ngakubonela eduzane esigabeni sethu. Ngilapha ngimadolonzima ngoba kuzaba nzima ukuthi kuphele kimi lokhu, sengisesaba lanxa ngibona abantu nje.
“Intsha yakulezi nsuku isiphila impilo engazwisisekiyo njalo lenhlonipho kabaselayo. UElias uzwise wonke umuntu ubuhlungu ngoba ubefuthelwa simkhangele njalo igazi livuza engani kuhlinzwe inkomo ,” kulandisa uNkszn Moyo.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikile ehofisini labo.
“Udaba lwamadoda agwazane efolele ukudla lufikile ehofisini lethu. Sithanda ukukhuthaza abantu ukuthi bangahambi bethwele izikhali ngoba lokhu kuyingozi. Sicela njalo ongabe elolwazi lwalapho okulabasolwa abikele amapholisa aseduzane laye ngokuphangisa,” kuphetha uInsp Ndebele.
