uMthunywa
USUKU lwe-Africa Day lujonge ukugubha lokuthakazelela ukuphumelela kwenhlanganiso yeOrganisation of African Unity (esibizwa ngokuthi African Union) kusukela isungulwa mhlaka 25 Nkwenkwezi, 1963 kulwisa umbuso wabelungu.
Ukugujwa kwalolusuku kujonje ukutshengisa intuthuko esibekhona kweleAfrica, kukhangelwa njalo izindubo izwekazi leli elibhekane lazo. NgoLwesibili abesifazane abahamba phambili kunhlangothi ezitshiyeneyo bakhulume ngokuqakatheka kosuku lwe-Africa Day.
UMphathintambo wogatsha olubona ngezokuhanjiswa kwemibiko uSenetha Monica Mutsvangwa uthe usuku lwe-Africa Day kweleZimbabwe lumoqka elizweni leZimbabwe ngoba kukhunjulwa umnikelo wenkululeko, intando yenengi labantu kanye layo inkululeko.
“Silapha lamuhla njalo sikhululekile ngenxa yokuthi i-Africa yasisekela ngesikhathi sisilwa impi yenkululeko saze sayathola uzibuse. Kungakho-ke njengabesifazane beZimbabwe sithakazelela lolusuku oluqakathekile lamanye amazwe.
“Kumpi yenkululeko lapho esalwisa ukubuswa ngabelungu, omama balwa eceleni labobaba. Endleleni sazikhulula njalo ekuhlukuluzweni yikuqakathekiswa kwabobaba ngaphezu kwabomama kanye lokunye njalo ukuhlukuluzwa ngobulili okwakusenza omama bangaphumeleli njalo bangafinyeleli amaphupho abo.
“Ngosuku lolu sithakazelela osokwenziwa ngomama ekwakheni elizwe leZimbabwe,” utsho njalo.
“Kusesekhona ubunzima okumele sibunqobe kodwa siduduzwa yikuthi siyazi ukuthi kuzakuba lokulinganiswa kwamathuba ngobulili okupheleleyo maduze nje. Isisekelo sombuso laso siyakusekela lokhu,” kutsho uSenetha Mutsvangwa.
Ukusayinwa kwamuva okwenziwe kusivumelwano se Africa Free Trade Area kusinikeza ithemba lokuphumelela kwezomkhonomi njalo amakhosikazi eAfrica azakube ekhona lawo eceleni kwabobaba. Mayibuye i-Africa,” kutsho uMutsvangwa.
Umkhokheli wenhlanganiso yeLabour Economists and African Democrats uNkosazana Linda Masarira uthe i-Africa Day ngeyokuthakazelela kanye lokunanza ukubambana, ukusebenzelana, ubuhlakaniphi, izinhlupho kanye lempumelelo.
“Omama kumele bathathe indawo yabo eFrica ukuze babe lesiqiniseko sokuthi izwekazi liyabambana yiloba sehlukene, baphinde bakhe ikhansili yabomama ezabuyisela isithunzi samakhosikazi e-Africa.
