uMthunywa
Bongani Ndlovu
KUGIDWE kwahlatshelwa ngoMgqibelo eLupane kukhunjulwa usuku inkosi uLobengula eyanyamalala ngalo ngemva kokulwa lamakhiwa.
Umcimbi lo, waqala esigabeni seMalungu North lapho inkosi uLobengula eyasukela khona lamabutho ayo ngaphambi kokuba uzhizhi lwabantu luyetheleka kumfula uTshangane inkosi eyachapha khona ilanda isigaba sePupu lapho okulesihlahla eyafika yaphumula kuso andubana kulwiwe impi yokucina phakathi kwamaNdebele lamakhiwa ngaphambi kukuba inkosi inyamalale ebusweni bomhlaba.
Ekhuluma lentatheli kaMthunywa uMlisa wesigaba uMnumzana Norman Moyo ubike ukuba bayawuthokozela lo umcimbi njengesigaba.
“Umcimbi lo usinika isithunzi esigabeni sethu ngoba isikhumbuzo seNkosi senziwe lapha ngemva kweminyaka eminengi.
“Umcimbi lo uyinto enkulu kuntsha yakhathesi ukuthi bazi ukuthi leyo inkosi ababala ngayo emabhukwini yayingumuntu wenyama owaphila labantu benyama endaweni ephilayo kungakho sinxusa ukuthi uzulu wonke ezobona lapho okwahamba khona uLobengula ngaphambi kokunyamalala,” kuveza uMlisa uMoyo.
Uqhubekele phambili esithi isikhumbuzo lesi senza imisebenzi yenkosi kanye lesithunzi sayo singatshabalali.
“Siyajabula nxa sekufika izethekeli zangaphandle okutsho ukuthi isikhumbuzo senkosi ayisinto engama khathesi ngoba isihuga labantu bakhatshana abafuna ukuzothola ulwazi ngePupu edume okwamagama,” kuchaza uMlisa Moyo.
USobhuku uElmon Tshuma ubonge abantu bendaweni yakhe.
“Sithanda ukubonga uzulu wonke othe wathatha lelithuba ukuzobuyisa inkosi enkulu yamaNdebele uLobengula esigabeni lapho aphunyuka khona amabhunu ayethunywe ukuzomhlasela ukuze isiko lamaNdebele liqhubekele phambili njalo singakhohlwa lapho esivela khona,” kuphetha uSobhuku uTshuma.
