uMthunywa
Listen Ndlovu
AMAPHOLISA akoBulawayo achwayisisa ngokugqekezwa kwenye indlu eHope Fountain lapho okutshontshwe khona igolide elingaba yi-50kg.
Kubikwa izigelekeqe ezenze lokhu zifike kuleyondlu mhlaka 25 Mbimbitho zatshaya umamangala ngerekeni andubana zitshontshe isaka ebelifakwe igolide eliyi-50kg.
Kuzwakale ukuba ngehola letshumi ebusuku amapholisa ayebhoda kuleyondawo ekhangela abona imota yomhlobo weHonda Fit ayimisa kodwa umtshayeli wabaleka wayatshayeka esihlahleni. Kubikwa umtshayeli lomunye ayehamba laye baphuma bacela ezinyaweni batshiya imota lamakhiye khonapho.
Amapholisa athola isithupha sikaEnerst Sibanda endaweni kamtshayeli kanye legolide eliyi-50kg kuleyo mota.
Isikhulumi samapholisa akoBulawayo uInspector Abednico Ncube uthe amapholisa asadingisisa ngendaba le.
“Umnikazi wemota ukweleSouth Africa, uEnerst okutholakale isithupha sakhe emoteni ubeqhatshwe ukuthi atshovise ngemota le ngumzawakhe womnikazi wemota.
“Abantu kabaqaphele njalo ukuba ngobani abatshayela izimota zabo ngoba nxa kungaba lobugebenga obenzakalayo amacala akhona acina ebuyiselwa kibo.
Sikhuthaza izakhamizi ukuba ziqalise amaqembu azasebenzisana lamapholisa ekukhangeleni endaweni abahlala kuzo ukuze bavikele ubugebengu,” kuphetha uInsp Ncube.