uMthunywa
Listen Ndlovu
KUFE umuntu oyedwa ngesikhathi izelamani ezimbili zihlasela ezinye njalo izelamani ezintathu kubangwa ukuthi kungani bezalise ukunatha utshwala ngesikhathi kuqhutshwa inkonzo yomngcwabo.
UTapiwa Ziyambi kunye labafowabo ababili uTererai Ziyambi loShepherd Ziyambi abahlala esigabeni seDzingisai ngaphansi kwenduna uChireya babephethe inkonzo yomngcwabo mhlaka 15 Nkwenkwezi baze bakhuze uLeon Muringi loPritchard Muringi ababenatha uMagwebu.
Kubikwa lokho akuzange kubaphathe kuhle abakoMuringi ngoba bathi ngemva komngcwabo, sebehlangana loTapiwa labafowabo babahlasela kubangwa ukuthi kungani bebakhuzile esililweni.
ULeon kubikwa nguye owahle waqala ukugwaza uTererai ngesikhali esicijileyo, uTapiwa wangenela ezama ukulamulela umfowabo kodwa uPritchard wahle wamhlangabeza wamgwaza wafela lapho.
ULeon waphinda waphendukela uShepherd wamgwaza umzimba wonke wamtshiya elimele wabaleka.
Isikhulumi samapholisa eMidlands uInspector Emmanuel Mahoko uthe indaba le isisezandleni zamapholisa.
“Amapholisa afinyelela lapho okwenzakala umonakalo lo.
Umufi uTapiwa Ziyambi wahanjiswa emotsha yesibhedlela seGokwe ukuze kuyohlolwa isizatho sokufa kwakhe.
Kukanti uTererai loShepherd balalisiwe esibhedlela esifanayo njalo basesimeni esibi.
“Amapholisa acela labo abangabe belolwazi mayelana labasolwa ababili uLeon loShepherd Muringi ukuba babikele amapholisa aseduzane labo,” kutsho uInsp Mahoko.
