uMthunywa
Thokozile Mbedzi
KUSEHLAKALO esitshiye izakhamizi zesiqintini seSimukayi eMwenezi ziphethe amathumbu ngezandla, kulomntwana ofe ngemva kokuba inqola itshaye isitompi sesihlahla yabhewuka, ngeSonto edluleyo.
Kubikwa uIrene Madondo oleminyaka engu-12 uhle wambokothwa yinqola elomunye abehamba laye oleminyaka engu-11 kodwa ngokusweleka kwenhlanhla yena ulimele kakhulu okubangele ukuthi afe.
Ekhuluma lentatheli kaMthunywa uBlessing Ndlovu uthe babone into yamehlo. “Silusizi ngokusehlele lapha, abantwana bakamakhelwane babophe inqola basebehamba bengabantwana bethunyiwe. Basuka bebabili ngakibo umfana lenkazana.
“Besendleleni bahlangana lengozi le, inqola yatshaya isitompi yabhewuka uIrene watshayeka ngekhanda enqoleni wahle wafela khonapho.
“Umfana walimala abazali labomakhelwane bamthwalela ngekhaya lapho okuhle kwabikelwa amapholisa ngodaba lolu,” kulandisa uMnu Ndlovu.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo.
“Udaba lomntwana ofe ngesikhathi inqola ibhewuka solufikile ehofisini yethu. Amapholisa axwayisa abazali ukuba ngazo zonke izikhathi bananzelele abantwana njalo kumele bahlale bebona ukuba baphephile.
“Uzulu uxwayiswa ukuba ngaso sonke isikhathi inqola kazikhokhelwe ngoba kubalula ukuqondisa inyamazana ezikhokhelweyo nxa sezenze iphutha.
“Inyamazana lapho nxa zingayenza okungaqondanga ziphange ziqondiswe ukuze senqabele ingozi ezifanana lale ekuhambeni ngezinqola,” kuphetha uInsp Dewa.
