uMthunywa
KWEHLE iyezi elimnyama eduzane leMokopane eLimpopo kweleSouth Africa lapho kusifa izizalwane zeZimbabwe ezingu-14 kungozi yomgwaqo ngoLwesithathu ekuseni.
Isikhulumi samapholisa abona ngokuhamba kwezimota eLimpopo, uKagiso Mootane uthe imota kamalayitsha akade ithwele abantu laba ingqikilane legonyethi kwahle kwafa abanye kugoqela usane kanye lomtshayeli wemota ebibathwele.
“Kwenzakale ingozi eLimpopo lapho okungqikilane khona imota ebithwele izizalwane zeZimbabwe lemota enkulu eduzane leMokopane.
“Imota le ibethwele izizalwane zeZimbabwe ebezisiya eGoli,” kutsho uMootane.
UMootane wengezelele wathi kulimele abantu abathathu kulingozi bahle bagijinyiselwa esibhedlela lapho abelatshwa khona.
Ingozi le iza ngesikhathi abaphathi bezemigwaqo eZimbabwe laseSouth Africa bephezulu kokubopha isinqumo sokuthi bajezise abatshayeli abephula imithetho yemigwaqo bajeziswe kanzima.
Ngokutsho kukaMootane, kuthiwa umalayitsha wehluleke ukuqondisa imota yakhe, wehluleka njalo ukubamba imqobotsho wasengenela phakathi kwecele lomgwaqo obekuhamba igonyethi. —Ubulembu
