Uncategorized

Kufe ingane 2 zinathe amaphilisi okulondoloza isivuno

24 Jun, 2022 - 13:06 0 Views
Kufe ingane 2 zinathe amaphilisi okulondoloza isivuno uInspector Glory Banda, Mat north

uMthunywa

YiNtatheli kaMthunywa

INDODA lomkayo abeLusulu, eBinga basele bethwele imikhono ekhanda kulandela ukufa kwabantwababo ababili endleleni besiya esibhedlela ngemva kokubanika amaphilisi okulondoloza inhlanyelo besithi ngawokwehlisa ubuhlungu.

Isikhulumi samapholisa esabelweni seMatabeleland North, uInspector Glory Banda uqinisekise umbiko lapho okubhubhe uSibusisiwe Furunga oleminyaka engu-9 yokuzalwa loYolanda Ncube oleminyaka engu-8 yokuzalwa besigabeni seNtivuli, eLusulu kulandela ukufa ngemva kwamahola ambalwa benathe amaphilisi la.

Abantwana laba kubikwa bakhuphe okwedlulisileyo baphinda bagijinyiswa layizisu okuyikho okubangele ukuba ngemva kwamahola athile benathe amaphilisi la badlule phakathi kobusuku ngoMvulo.

“Samukele umbiko wokufa kwabantwana abancane okwenzakale ngemva kokuba benathe amaphilisi omuthi wokulondoloza amabele esiphaleni,” kutsho uInsp Banda.

Uthe amapholisa asaphenya udaba lolu, loba kungakabi lomuntu osetheswe icala leli.

“Ukuphenya kuyaqhubeka kodwa imbiko yakuqala iveza ukuthi umuntu othengisele abantwana laba amaphilisi ubenakanela ukuba bafuna umuthi wokulondoloza umumbu,” kutsho uInsp Banda.

USibusisiwe loYolanda bebengezwa kuhle ngoba bebelomvimbano.

UInsp Banda uthe ngoMvulo ngehola lika-4, unkosikazi Faliwe Sibanda oleminyaka engu-49 ongunina kaSibusisiwe lobabakazi kaYolanda bathuma uSibusisiwe lomzukulu wakhe uSiphiwe Ndimande ukuyathenga amaphilisi okwehlisa ubuhlungu esitolo esiseduze.

UNkszn Sibanda wapha uSibusisiwe loSiphiwe igalani  lomumbu ukuyatshintshisa ngamaphilisi esitolo.

Abantwana befika esitolo, baqonda kuMnumzana Simbarashe Dhema oleminyaka engu-47 yokuzalwa bamtshela ukuthi bafuna amaphilisi omumbu.

UMnu Dhema kucatshangelwa ukuba watshela abantwana laba ababili ukuthi bephume phandle kwesitolo egoqela amaphilisi lawa, okugcina umumbu ngephepha lepulasitiki alibopha phezulu.

Kucatshangelwa ukuba ngemva kwalokhu wathatha umumbu wabesefaka amaphilisi phakathi kwesaka elingela lutho wabalaya ukuthi bangawabambi bayenika unina.

Befika endlini, bafika banika uNkszn Sibanda owafika wawagcola wawapha uSibusisiwe loYolanda ukuthi banathe.

Phakathi kobusuku, abantwana laba ababili baqala ukukhupha njalo begijinyiswa yizisu.

UNkszn Sibanda wathatha amaphilisi aseleyo wagijim wayaa esitolo kuMnu Dhema ukuyabuzisisa watshelwa ukuthi abantwana bacele amaphilisi okulungisa inhlanyelo.

UNkszn Sibanda lomyeni wakhe bathwala abantwana laba ababili ngenqolo behlose ukuya esibhedlela esiseduze okuthiwa yiChishidza Clinic ngemva kokuhamba amakhilomitha ambalwa abantwana laba bedlula emhlabeni.

Ababili laba baphindela emuva lezidumbu zabantwana andubana bayebikela amapholisa ngelanga elilandelayo.

Izidumbu zathwalelwa koBulawayo ukuze zizohlolwa imbangela yokufa.

Share This:

Sponsored Links