uMthunywa
BULAWAYO — UKUKHWELA kwenani labantu ababulawa yiCovid-19 koBulawayo kuqansise izinga lokufa kwabantu elizweni ngenxa yomkhuhlane lo, laya ku-2,9 phesenti, okulinani eliphezulu emhlubulweni lo.
Izinga lokufa kwabantu liveza inani labantu ababulawa yisifo esithile phakathi kwalabo abatholakala belomkhuhlane lowo. Lanxa abantu asebetholakale belomkhuhlane lo bebalutshwana kulabaseSouth Africa, iziphathimandla seziphakamise ifulegi ebomvu ngokwanda kwenani labantu asebefile koBulawayo phakathi kwamadolobha alabantu ababulawa ngumkhuhlane lo.
Kusukela ngoMvulo kusiya kuLwesihlanu kuviki ephelileyo, kulabantu abayisithupha abafileyo koBulawayo, okubangele ukuthi inani labantu asebefile edolobheni leli liqanse liye ku 62 phakathi kwabantu abangu-250 asebefile elizweni.
Umxhumanisi omkhulu weNational Response yeCovid-19 uDokotela Agnes Mahomva ubikele intatheli yeSunday News ukuthi lanxa inani labantu abahlaselwa ngumkhuhlane lo selehlile nxa kuqathathiswa lamanye amazwe, kodwa ilizwe leZimbabwe yilo elilabantu abanengi abafayo kusizwekazi seAfrica.
“Ukufa kwabantu koBulawayo kwenza sikhathazeke sonke. Izinga lokufa kwabantu elizweni liku-2,9 phesenti, okulinani eliphezulu, eliphezulu kulasemazweni onke. Lanxa abantu besila (94,2 phesenti) abanye abantu abahlaselwa yiCovid-19 bayafa. Akukuhle lokhu,” kutsho yena.
UDkt Mahomva uqhubekele phambili esithi nsukuzonke kulabantu ababanjwa umkhuhlane lo okwenza kube luhlupho.
Abantu kumele balandele izixwayiso ukuze baphephe emkhuhlaneni lo.
