uMthunywa
Cornelius Luphahla
KUVUKE impi kwachitheka igazi emcimbini we-rumba eHillbrow Theatre kweleSouth Africa lapho abaculi abadabuka kuleli akade belomcimbi wokuhwatsha idlalade qede enye indoda yadubula abantu abalitshumi kwafa oyedwa.
Isiga lesi senzakale ngeSonto lapho uMilton Ncube (33) adubule khona uAnnie Ncube, Allied Ncube, Samuel Ndlovu, Sukoluhle Makakula, Buyile Nkomo, Alex Savanna, Agrippa Chua, Witness Mpofu, Forget Ncube balimala okwenze bathwalelwa esibhedlela seCharlotte Maxeke eJohannesburg kwathi uMnumzana Allan Percy Ndlovu wafa, ethi bamtshontshele umakhalekhukhwini wakhe.
Kubikwa umcimbi lo ubungowokukhitshwa kwedlalade lomculi wodumo uAllen Ndoda loGift Amuli noma nje ubulamaqembu abaculi be-rumba atshiyeneyo njalo bonke abadutshuliweyo ngabadabuka kweleZimbabwe.
UMthunywa uxhumane lomculi kamaskandi uBrighton Sibanda obekhona kusenzakala isehlakalo lesi walandisa ngendaba le ethi lokhu ethithibele.
“Sithe sisabukele abaculi bedlala ingoma zabo uNcube wasukuma wayacela i-mic kuMhleli womcimbi wasesithi uselahlekelwe ngumakhalekhukhwini wakhe. Kuthe kunjalo abantu bathula wasedubula phezulu kwasukuma eyinye indoda yamkhuza.
“Ngalesosikhathi wazama ukuyidubula yasilala phansi wahle waqalisa ukudubula abantu waze wayaphuma phandle elokhu edubula wabaleka. Sithe sesihlolisisa sathola ukuthi udubule abantu abalitshumi kwafa oyedwa. Ngalokhu ngisathithibele lakhathesi ngoba kangikaze ngikubone okunjeya,” kutsho uSibanda.
URemember Zikhali ongomunye wabaculi be-rumba abadabuka kuleli uthe isigebengu lesi sesibanjiwe kodwa sokumiswe ama-shows amabili abefanele enziwe ekuqaleni kwenyanga ezayo ngenxa yokwesaba ubudlwangudlwangu lobu.
“Ngemva kokuba isigebengu lesi sidubule abantu kulama-shows amabili asemiswe ngabaculi agoqela ekaThemba Boyoyo Mathe oweMthimbane Sound Blasters obekufanele ibekhona mhlaka 2 Mpandula lenye njalo eyaleliqembu lihlangene leKwite Connection leMbamba Express obuzakuba khona mhlaka 9 Mpandula.
“Lokhu bakwenze ngenhloso yokuthi bancedisane lalabo abalahlekelweyo, ngalokhu sikhuthaza uzulu ukuthi aphathise ngalokhu alakho ukuze senelise ukuthwala isidumbu sikamuyi siyebekwa ekhaya ePlumtree,” kutsho uZikhali.
Imizamo yokukhulumisana lesikhulumi samapholisa uCaptain Philip Radebe yehlule ngoba ucingo lwakhe alubanjwanga muntu.
