uMthunywa
Thokozile Mbedzi
ZITHITHIBELE izakhamizi zeMasera leToporo eBeitbridge ngemva kokuba kuqhamuke impi phakathi kwabontanga bezigabeni lezi zombili okucine kubangela ukuthi kudutshulwe oyedwa kubangwa izikhumba zenyamazana.
Umuyi uLavhelesani Penisela udutshulwe phakathi kwamabili ngoLwesibili.
Kubikwa abafana laba abangabazingeli abangekho emthethweni bacine bebulele omunye ngoba esengene endaweni engayisiyo yabo yokuzingela.
Ekhuluma lentatheli kaMthunywa uVanakahani Moyo omunye oyisakhamuzi kule indawo uveze ukuthi abafana laba bangamaqembu amabili ngakho babelana indawo okucina kubangela ukuthi kungaba loweqa umngcele lo kulavuka impi enkulu.
“Abafana laba abavela eMasera kanye leToporo banikana umngcele kungakho akumelanga kube leqembu eleqa lowomngcele.
“Kubikwa iqula likaPenisela leqa umngcele wabo okwabangela ukuthi iqula laboFuture eselihluphile limdubule.
“Iqula laboFuture leli, ngeviki ephelileyo liqamule omunye unyawo egangeni kungakedluli insuku ngaki baphinde njalo bagamula omunye emhlane bethi ungeneleni endaweni yabo wazingela,” kulandisa uMnu Moyo.
UMthunywa uzwe ukuthi uPenisela udutshulwe nguFuture ngoba ezingele wathola isikhumba senyamazana esilemali enengi.
Esinye njalo isakhamuzi esixoxisane loMthunywa uNkosazana Janet Mavhu uthe sebehlalele evalweni ngenxa yabafana laba.
“Sesihlalele evalweni ngenxa yabafana laba ngoba akula muntu othi nklwe lanxa elinyazelwe umntanakhe ngoba omunye lomunye usesabela impilo yakhe.
“Abantwabethu kabasakhululekanga ngitsho lapha esigabeni ngenxa yamaqembu la womabili. Bazenzela umathanda lapha, ngoba bangaze balimaze umuntu kababotshwa, imali yabo ibenzela konke.
“Sidinga ukuvikelwa ngabomthetho lapha ngoba sisegangeni. Asazi ukuthi imibhobho le abayisebenzisa ukubulala abanye bayithatha ngaphi,” kuchaza uNkszn Mavhu.
Isikhulumi samapholisa esabelweni Matabeleland South ebuzwa ngodaba lolu uthe usemhlanganweni.
