uMthunywa
YiNtatheli kaMthunywa
NGESONTO indlela ziqonda enkudleni yeBarbourfields lapho okulomdlalo omkhulu phakathi kweHighlanders leChicken Inn.
Ubukhulu balumdlalo yikuthi zombili zingomakhelwane koBulawayo lokuthi kudibana amaqembu okwaziwayo ukuthi ayadelelana enkundleni.
IHighlanders isanda kuthwala inkezo kazibuse ngakho kukhona ukuzethemba kubadlali bayo.
Ama-Gamecocks wona azitshaya isifuba ngoba aphezulu kwengalane yeCastle Lager okwamanje ngemiklomelo engu-26. IBosso ikunombolo yetshumi iphethe imiklomelo engu-14 kuphela.
Ukuqina kwabadlali beChicken Inn yikho okuthabisa umqeqetshi uJoey Antipas obikele uMthunywa ngoLwesibili ukuthi umdlalo uzahlabusa.
“Siwulindile umdlalo wethu leHighlanders.
Kweyami inkamba abafana baqinile njalo bazimisele ukuphuma lemiklomelo ngeSonto,” kutsho umqeqetshi lo.
Kumidlalo edluleyo, ukuqina kweChicken Inn kubonakale ikakhulu esiswini senkundla kubadlali ababalisa uNielson Ketala, Sheppard Mhlanga, Clarkson Dzimbiri loBrett Amidu.
Imvimbi zeHighlanders kuzamele ziqaphele uBrian Muza loMarlvin Hwata ngoba nxa bengena ebhokisini bajwayele ukuhlohla.
Kumidlalo engu-18 edluleyo phakathi kwamaqembu la, iChicken Inn isinqobe iBosso kumahlandla ayisitshiyagalombili kuthi iHighlanders seyanqoba kathathu.
Zadlala ngokulingana kasikhombisa.
Amaqembu la acina ukuhlangana kumdlalo weligi mhlaka 2 Mfumfu ngo2019, iHighlanders yanqoba 2-0.
Umqeqetshi weHighlanders uMandla Mpofu utshele iphephandaba likazulu ukuthi uqaphele ukuba badibana leqembu elitshisayo kulezinsuku.
“Siyazi ukuthi iChicken Inn akusiqembu esingalidelela.
Okuhle kuyabukwa sibili ngoba idlala kuhle, ngakho kuzamele sikhiphe wonke amacebo okunqoba esilawo,” kutsho uMpofu ngesikhathi eqeda ukulolonga abadlali bakhe ngoLwesithathu.
Kusenjalo, iBulawayo City inxuse iBulawayo Chiefs ngoMgqibelo kumdlalo ozabe useBarbourfields.
Imidlalo yonke ngokugcweleyo:
NgoLwesihlanu: Yadah v Triangle United (National Sports Stadium)
NgoMgqibelo: Bulawayo City v Bulawayo Chiefs (Barbourfields), Herentals v FC Platinum (National Sports Stadium), Black Rhinos v Tenax (Sakubva), Ngezi Platinum Stars v Harare City (Baobab), Whawha v Dynamos (Ascot)
NgeSonto: Highlanders v Chicken Inn (Barbourfields), Manica Diamonds v ZPC Kariba (Sakubva), Caps United v Cranborne Bullets (National Sports Stadium)