uMthunywa
KULEZIGELEKEQE ebesezihluphile ezibanjwe xhaka ziseba komunye umuzi yizakhamizi ezithe ngenxa yokuthukuthela zazihlasela andubana zizitshise endaweni okuthiwa yiNyanga kweleSouth Africa ngoMgqibelo kuviki ephelileyo.
Izigelekeqe lezi ezimbili ezibanjwe zitshontsha zihle zathathwa yizakhamizi ebezizonde zigane unwabu ngoba sokulesikhathi eside zihlukuluzwa ngamasela la okubikwa abebamba abantu inkuzi ebethusela ngama-okapi kanye lemibhobho.
Izakhamizi kubikwa ziqoqane zaqala ukutshaya amasela la kwaba luthuli amadoda amadala ekhala ecela uxolo kodwa lokhu akuzange kuncede ngoba abantu bebezimisele ukufundisa amasela la isifundo angasoze asikhohlwe.
Esinye isakhamuzi sakule indawo uMnumzana Jack Miller uthe yena wayengekho mhla kutshaywa amasela kodwa uthi uzwa kuthiwa aboniswa into yamehlo engakafi amadoda la womabili.
“Mhla kusenzakala konke lokhu ngangingekho kodwa ngizwa kuthiwa atshaywa kabuhlungu amadoda la aze avuza igazi emzimbeni wonke.
“Abantu babebabambe bezama ukutshontsha kwenye indlu kamakhelwane okwabangela ukuthi bahlaselwe andubana batshiswe,” kutsho uMnu Miller.
Esinye njalo isakhamuzi esale ukuqanjwa ngebizo sithe abantu babewazi amasela la njalo babewesaba.
“Abafana laba bebehlala behlukumeza abantu bebethusela ngengqamu kumbe ngombhombo oyithoyi kodwa abantu babengelaso isiqiniseko sokuba umbhobho lo ngoweqiniso sibili kumbe hatshi. Bebesesatshwa abafana laba emphakathini, kutsho lesi sakhamuzi.
Elinye ixekana lamanina litshele iphephandaba leDaily Sun ukuba besebediniwe ngezigilamkhuba lezi ezimbili ngoba bebehlala bengena ezindlini zabo betshontsha abakufunayo.
“Abantu bakule indawo bakubone kungcono ukuthi batshengise abanye abakade besebenzelana lezigilamkhuba lezi ukuba izigelekeqe ezihluphayo zenziwani.
Isikhulumi samapholisa endaweni yeWestern Cape khonale uCaptain Ferdrick van Wyk uvumile ukuba kutholakale izidumbu zabantu ababili ababulewe ngumphakathi komunye umlindi eduze lenjanji yesitimela.
“Kuvulwe idokhethi lecala lokufa kwabantu laba ababili, indaba yonke isadingisiswa”, kuphetha uCaptain van Wyk. — Ubulembu
