uMthunywa
Thokozile Mbedzi
AMAPHOLISA eMasvingo adinga izigebengu ezibulele izithandani esezikhulile ezivuke zifile esigabeni seMugovera ngoLwesihlanu ngeviki ephelileyo.
Kubikwa uManiso Chiponda oleminyaka engu-79 lonkosikazi wakhe uMasciline Chiponda oleminyaka engu-75 batholakale belamanxeba okuhlahlelwa ngamahloka emakhanda kunye lebusweni endlini yabo yokulala okucatshangelwa ukuthi bangabe behlaselwe yizigebengu.
Nyakenye uMthunywa uke waloba njalo udaba lwezinye izaguga zePlumtree azabulawa zatshiswa.
Kuzwakale ukuthi uPeter Tsuro oleminyaka engu-41 obesebenzela laba ababili wayesuke esiyathelela ngehola lika-4 ilanga selisiya ngomtshawendoda waze waphenduka ngehola lesibili emadabukakusa edakiwe.
Kubikwa izithandani lezi zazisele lonkosikazi kaTsuro, uBrenda Kabhanga yena owehlukana labo ngo7 ntambama sebesiyangena endlini yabo yokulala.
Ekhuluma lentatheli kaMthunywa uMnumzana Nephart Moyo uthe lokhe betshwaqe umzimba ngendlela ababili laba ababulewe ngayo.
“Simadolonzima ngesehlakalo esehlele imuli yakoChiponda ngoba abadala laba bahamba ukuyaphumula ngo 7 ntambama.
“UTsuro ekuphendukeni kwakhe ngabo 2 emadabukakusa isimanga saba yikuthi wathi ethutsha wabona isivalo sendlini kaChiponda lonkosikazi wakhe sivuliwe yikho ukuyakhangela wafica abadala laba belele phakathi kwechibi legazi njalo belamanxeba ekhanda.
“Kukhanya abadala laba babelemali endlini yabo kodwa esinye isimanga esilaso yikuthi ngeke kwenzeke ukuthi abadala laba ngesikhathi behlaselwa kabazange bahlabe umkhosi loba nje ukuthi kuzwakale umsindo.
Kuyamangalisa-ke ukuthi kungani unkosikazi kaTsuro engazange azwe msindo,” kulandisa uMnu Moyo.
Omele isikhulumi samapholisa esabelweni seMasvingo uSergeant Lloyd Masundire ebuzwa ngodaba lolu uthe solufikile ehofisini yabo ngakho basaluphenyisisa.
“Udaba lwabantu abadala ababili ababulewe emzini wabo abatholakale behlahlelwe amakhanda lobuso solufikile ehofisini yethu njalo sisaluphenyisisa.
“Sicela uzulu ongaba lolwazi lokuba izigelekeqe lezi zifinyelelwe yisandla somthetho abikele amapholisa asaduzane laye kumbe atshaye ucingo,” kuphetha uSgt Masundire.