uMthunywa
Thokozile Mbedzi
KUBOTSHWE amasela amabili enkomo esigabeni seMwenezi eMasvingo ngoLwesibili kuviki edluleyo kulandela ukutholakala elenkomo ezingu-36 ezitshontshiweyo.
Amasela la, uTawanda Masote oleminyaka engu-41 owesigabeni seNkomaphi kubikwa ubeyisithunywa sikaJacob Gwenhamo oleminyaka engu-38 owesigabeni seNdovhe lapho okutholakale inkomo ezingu-36 ezitshontshiweyo.
Amapholisa abike ukuthi lokhu esalandela umkhondo wenkomo lezi ezitshontshiweyo okutsho ukuba inani leli lingakhuphuka.
Omele isikhulumi samapholisa esabelweni seMasvingo uAssistant lnspector uLorraine Ndlovu uthe amapholisa abophe amadoda amabili kulandela ukutholakala elenkomo ezingu-36 ezitshontshiweyo.
“Sibophe uTawanda Masote esithe sesimbophile wachaza ukuba usebenzela uJacob Ngwenhamo. Uthe yena uyatshontsha amathokazi kwezinye iziqinti ezisekucineni kwesigaba seMwenezi abe sesiyalazo esiqntini seNdovhe.
“Amathokazi la bebewatshintsha ngenkabi ezinkulu babe sebesiyazithengisela abezilaha. UJacob uvele usezandleni zamapholisa ngelinye icala lobugebengu kungakho uvalelwe ejele.
“Kwatholakala inkomo ezingu-36 ezinhlanu zahle zasiwa kubanikazi,” kulandisa isikhulumi lesi.
Siqhubekele phambili siveza ukuthi inani lenkomo ezitshotshiweyo esezitholakele selikhuphuke laya ku-54.
“Sixwayisa uzulu kunye labezilaha ukuthi batshiye umkhuba wokuthenga loba ukutshintshana inkomo kungela mvumo evela emapholiseni esikuthi yi-clearance ngoba lokhu kudala ukuthi bacine betshontshelwa inkomo zabo,” kuphetha uAsst Insp Ndlovu.
