uMthunywa
Thokozile Mbedzi
INHLANZI itshelwe ngamanzi kumadoda amane eSizeze eGwanda abotshwe ngemva kokubanjwa elenkomo ezitshontshiweyo kuviki ephelileyo.
Amadoda la amane, abalisa uMthulisi Ncube oleminyaka yokuzalwa engu-25, uYekelani Ncube oleminyaka engu-40 yokuzalwa, uCharles Dube oleminyaka engu-48 loSimon Sithole oleminyaka engu-45 babanjwa behamba ngeloli yohlobo lweBongo ngamapholisa ethwele inkomo ezintathu.
Kubikwa amadoda la amane athi ethutsha ephakamisa amehlo abona kule-roadblock ahle amisa imota bucwadlana lamapholisa baqala ukuzama ukwehlisa inkomo ababezitshontshele uMnumzana Rain Nyathi (71).
Esinye isakhamuzi esilandisele uMthunywa uMnumzana Bongani Sibanda uthe lokhe bengelankani ngesibindi samasela athwala inkomo zezakhamizi ngemota.
“Bengizihambela ngidinga inkomo zami ngabona amadoda amane emisa imota khonokho ahle aqala ukuthukulula inkomo. Ekuqaleni bengisithi mhlawumbe imota silohlupho kanti hatshi bebehlose ukuthi imota idlule emapholiseni ingathwalanga lutho babe sebesiyazithwala phambili.
“Mhlalokho kukhanya bebengabuzanga elangeni ngoba bathe belokhu besazikhulula inkomo lezo amapholisa abasethelekile ngoba ebone amalayithi etshengisa ukuba imota imile.
“Omunye wabo ebona amapholisa wazama ukucela ezinyaweni kungela sikhathi ezingakanani bahle bambopha,” kulandisa uMnu Sibanda.
“Okusizwisa ubuhlungu kakhulu yikuthi uMnumzana Nyathi uselahlekele zinkomo ezingu-24 kwatholakala ezintathu kuphela ebezisemoteni ezinye 21 lezi lokhe kungaziwa ukuba zingaphi kodwa ngokubona kwethu kukhanya lezanyamalalayo zatshontshwa yibo laba ngendlela efanayo,” kulandisa uMnu Sibanda.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uvumile wathi solufikile ewofisini labo ngakho baxwayisa uzulu ukuba keluse izifuyo ngaso sonke isikhathi.
“Udaba lwamadoda amane abanjwe ethwele inkomo selufikile ewofisini yethu sithanda ukuxwayisa uzulu ukuba eluse izifuyo ngoba amasela semanengi”.
“Sibonga usekelo lukazulu ngoba kube labancwebe amapholisa indlebe lakanye bazibamba izigelekeqe lezi njalo sizaphenyisisa ukuba lezi ezinye ezingu- 21 kungabe kuyibo yini laba abane abazitshontshayo,” kuphetha uInsp Mangena.
