uMthunywa
Johas Moyo
ZISELE zibethwa ngumoya izakhamizi zeMashava eQaths Mine ngemva kokubanjwa kwenkalakatha yenhlathu ebisizidlisa inkobe ezilamatshe nanko phela ibisihlala duzane lezindlu zabo njalo isihlala ibonakala obekusenza impilo zabo lezabantwabazo zibe sengozini.
Kubikwa inhlathu le engamamitha angu-4,8 ibanjwe ngeviki ephelileyo esivandeni sikaLeenred Chiguvare njalo besokusele isibanganyana nje ukuthi ingene endlini.
UMthunywa uzwe ukuthi izakhamizi zenkomponi yeMashava le besezisesaba ukuhamba kuleyondawo njalo labantwana bebengasadlali bekhululekile ngoba inyoka sezigcwele kuleyondawo.
Esinye isakhamuzi sakule indawo esikhulume lentatheli, uMorgan Dube uveze ukuthi inyoka le ibisihlala ibonakala njalo bebesesaba ukuthi izacina ibangela ingozi.
“Sesibethwa ngumoya sibili ngoba sekukanengi sibona inyoka le, kumnyaka ophelileyo idle inkukhu ezedlula ezine.
“Khathesi labantwabethu sebezenelisa ukudlala emadwaleni singatshaywa luvalo njalo lezindlu besesihlala sivalile khona kutshisa kusenzenje,” kutsho uMnu Dube.
UMnumzana Leenred Chiguvare lapho okutholakale khona inhlathu le ubikele intatheli yephephandaba likazulu ukuthi inhlathu le itholakale esivandeni sakhe.
“Akula lutho olubi olwenzileyo, inyoka le ibisemzini wami kodwa okungethusileyo yikuthi ibisiseduze ukuthi ingene endlini.
“Inyoka le yabonwa ngunkosikazi wakhe ethelela ingaphansi kwebhobola njalo ngibonga kakhulu uNkulunkulu ngoba nguye owavikela unkosikazi wami njalo ngilenkukhu engizifuyileyo egumeni lami,” kutsho uMnu Chiguvare.
Omele abeParks and Wildlife uTapan Phiri ubikele uMthunywa ukuthi inyoka le ibinkulu njalo isesabisa.
“Inhlathu le ibingamamitha angu4,8 ubude okuyinto engakaze ibonakale ikakhulu ukuthi inyoka engako ihlale labantu kuyingozi kakhulu. Ngokunjalo sikhuthaza izakhamizi zakule indawo ukuthi bananzelele ngoba kungenzeka ukuthi inyoka le ibe itshiye abantwabayo kumbe enye yayo ngoba inyoka zandise ukuhlala zimbili ikakhulu esezikhule kangaka,” kuphetha uMnumzana Phiri.
