uMthunywa
SEKUTHE dlwe kuligi ka-Division One emhlubulweni ongezansi yelizwe ngokubikwa komvuzo we-US$3 000 ozabangwa ngamaqembu asephumelele kunkezo yeWafa Wafa.
Okwenza lokhu kube zindaba ezimnandi endlebeni zabadlali yikuthi sekuze kwafika isikhathi sokuthi umangoye kasoze alale eziko emakhaya abo.
Umdlalo ka-Division One kuleli awubhadali, loba ekhona amaqembu ambalwa asadalala ukuthi aholise abadlali.
Ngokusungulwa kwenkezo yeWafaWafa ngeviki eledluleyo, izinga lobungcitshi bomdlalo kuligi le bubonakele enkundleni ezinengi.
Lokugcwala kwababukeli enkundleni kube yisibonelo kuziphathamandla zemidlalo ukuthi isizungu besesihlasele ebantwini.
Ababukeli labathandi bakanobhutshuzwayo bazaphindela njalo ukuzibonela mathupha ithalenta elikhona kuligi ephansi le ngempelaviki, kuqhutshwa ihlandla lama-quater-final.
Iveziwe imidlalo yesigaba se quarter-final kumncintiswano lo ngoLwesibili.
Kuyo yonke imidlalo, okhangelelwe ukuthi udonse ababukeli ngowe ZPC Hwange leHwange FC ozadlalelwa enkundleni yeColliery ngoMgqibelo. Ukuhlelwa kwamaqembu kukhokhelwe ngosaziwayo emdlalweni uZenzo Moyo loHebert Dick.
Eminye imidlalo, iCasmyn leNdlovu Iyanyathela zidibana egcekeni leTurkmine ngoMgqibelo.
NgeSonto kuzadlalwa ngamakhanda kabili eWhite City Stadium lapho iBosso 90 ezabhekana khona le-Ajax Hotspurs, ikanti i-Arenel izadlala leMakhandeni Pirates.
Abaqoqi balumqhudelwano bazise ukuba le ezanqoba izaphiwa iUS$3 000. Iqembu elizadliwa kumdlalo wokucina izahamba ekhaya ephethe iUS$2 000.
“Wonke amaqembu azanqotshwa kuhlandla lama-semi-final azathola iUS$1 500.
Azakhitshwa kuma quarter-final azanikezwa iUS$500 linye ngalinye.
Akulamvuzo wemali ozatholwa ngamaqembu akhitshwa kusigaba sakuqala,” kuveza uluhlu lwemivuzo oluphawulwe yiligi.
Uluhlu lwemidlalo:
NgoMgqibelo: ZPC Hwange v Hwange (Colliery),Casmyn v Indlovu Iyanyathela (Turk Mine)
NgeSonto: Bosso 90 v Ajax Hotspurs, Arenel v Emakhandeni
