uMthunywa
NguNkosilathi Sibanda
IBHANGA leZB Holdings lizimisele ukuthi libe yingxenye yemvuselelo yamankampani akoBulawayo, ukuze zithunqe njalo intuthu zakuleli dolobho, kukhule umkhonomi welizwe.
I-ZB Holdings yenze isiqiniseko salokhu ngokuphawula uhlelo lwaphezulu lwezamabhizimusi olubizwa ngokuthi yi-Platinum Plus, olusungulwe kolunye ugatsha lwebhanga le eBelmont.
Kuloluhlelo, amabhizimusi asephiwe ithuba lokusebenzelana lebhanga lula, kusetshenziswa imitshina yakulezinsuku lamagagasi okuxhumana. Lokhu kubikwa kuzehlisa isikhathi sokutshona ebhanga kunye lokubhidliza umkhuba wokufola emabhanga.
Umaneja omkhulu weZB Holdings uMnumzana Shepherd Fungura, esethula umbiko wakhe ngePlatinum Plus, uthe bayajabula ukuthi basungule uhlelo lwabo koBulawayo ngoba yiso isigodlo samafemu aphethe umkhonomi welizwe.
Ukhulume egcizelela ukuba ibhanga lizakwenza konke okusemandleni alo ukuthi livuselele amafemu akulelidolobho.
“Ukuvulwa kweBelmont Platinum Plus Centre kutshengisela ukuthi sizimisele ukuvuselela amabhizimusi akulindawo,” kutsho uMnu Fungura.
“IBelmont Platinum Plus Service Centre ihlelwe ukuthi incede kakhulukazi amabhizimisi asebenzelana lebhanga lethu edolobheni lakoBulawayo.
Indawo yeBelmont yaziwa njengesigodlo samafekithali amakhulu. Sizimisele ukusekela idolobho lakoBulawayo ngoba le yindawo eligugu kithi. Ebhanga leZB sifuna ukukhulisa ibhizimusi lethu ngendlela ehlelekileyo njalo elethe ukusuthiseka lokubobotheka ebantwini. Sikholwa ekuthuthukiseni impilo zabantu.”
Ibhanga le ZB
UMnu Fungura uthe iZB Holdings, ngokwethula iPlatinum Plus Platinum Service Centre, izafuna ukuthi ixhumane lula lamabhizimusi asebenzelana lalelibhanga.
Ngaphandle kokuqinisekisa ukuvuselela amabhizimisi koBulawayo, ibhanga leZB Holdings selikhulise ibhizimusi layo kuMashonaland Holdings lokwengeza isisindo kubhizimusi lomshuwalensi eBotswana.
Ngokutsho kukaFungira, iZB Holdings isekela uhlelo lukaHulumende lokuthuthukisa umkhonomi olwe-National Development Strategy 1 (NDS-1).
“Sizimisele njalo ukuphatheka kunhlelo eziphakamisa umkhonomi ikakhulu kubhizimusi lezakhiwo lokuthuthukisa uzulu.”
Ukuzimisela kweZB Holdings sekunconywe linengi labosomabhizimusi abaphethe intambo kumafemu amakhulu aakundawo ezibalisa eBelmont, Kelvin laseDonnington.
Lamabhizimusi asacathula ababaze ngokufanayo, esithi alethemba lokukhula ngaphansi kweZB Holdings.
Amankampani la abike ukuthi sekulula ukuthi enze ibhizimusi ngalesi sikhathi sokusetshenziswa kwe-technology.
Umphathi we-Industrial Distributors uMnu Morgan Moyo ubikele uMthunywa ukuba iPlatinum Plus ikhanya izaphendukisa ukwethembana lokuzwisisana phakathi kwebhanga lamabhizimusi.
“Siyakubongela okwenziwe yiZB Holdings ngalesi sikhathi lapho inengi lethu lisesaba ukusebenzisa amabhanga. Ukuzwa ukuthi lelibhanga lifuna ukuvusa uBulawayo kuyajabulisa kakhulu,” kutsho uMnu Moyo.
UNkosikazi Mercy Mutambure olebhizimusi lokuthunga impahla uthe ukhangelele ukuthi aphathiswe kabanzi libhanga lakhe njalo uhlala elethemba lokuthi iZB Holdings izagcina isithembiso sayo.
“Ngililunga labomama abavula ibhizimusi lokuthunga impahla etshiyeneyo. Siphakathi kokuhlanganisa into ezinengi ukuze ibhizimusi lethi likhule. Sisebenzisa ibhanga leZB Holdings njalo sikhangelele ukuthi sincediswe kakhulu.”
