uMthunywa
YiNtatheli kaMthunywa
ABASEKELI beqembu leDynamos FC batshengisele njalo ukuba bangamahlongandlebe angahloniphi umthetho womdlalo ngemva kokugijimisa amapholisa enkundleni yeRufaro ngeSonto.
Kusemlonyeni yabantu ukuthi abasekeli balithimu kumele bakhuzwe ngokuyangisa abakwenze ngemva kokuthi ithimu yabo inqotshwe yiFC Platinum. Imfanekiso yabasekeli laba begijimisa amapholisa lezinja zawo ingabe ihlekisa kodwa kuyisenzo esicunule inhlanganiso yeZifa, iPSL labanye abasekeli beDynamos.
Kumfanekiso le, amapholisa abonakala ebaleka edonsana lezinja ngoba ejikijelwa ngamagabha langamambhodlela.
Unobhala walithimu uWebster Chikengezha utshele uMthunywa ukuthi ubeqala ukubona abasekeli beDynamos besenza ihlazo elinje.
“Abantu labana ayisibo beDynamos. Nxa iqembu lingenzi lutho akuzwisiseki ukuthi kungaba yini imbangela yokuthi abasekeli benze umsindo onjalo,” kutsho uChikengezha.
Kubikwa umsindo wabasekeli lo waqala phakathi laphakathi kwehlandla lesibili lomdlalo.
Ukukhutha igedi kwabadlali beDynamos lokuqhubeka kwabo bevoxa udaka enkundleni kwavusa idlabuzane lobuhlongandlebe kunengi labasekeli balo.
UMthunywa uxhumane labasekeli beDynamos abaseHarare labanye abaphuma koBulawayo ababukela umdlalo lo.
“Abasekeli beDeMbare baqala ukujika izigubhu zamanzi lamagabha omhlobo wonke wotshwala bethi kungani kungani amapholisa ebakhuza, “ kuchaza uNobel Zviripayi osekela iDeMbare.
“Kwasekukhwaza wonke umuntu owayegqoke imbala yeDynamos okokuthi kwakungasahlaleki eduzane labasekeli laba abasebephethe bejika loba yini ebabeyiphethe”.
UGilbert Nyikadzino wethule ukuba ubuhlongandlebe obedlulisileyo babonakala ngesikhathi sekhefu emdlalweni.
“Amapholisa ayekhona ehluleka ukukhuza umsindo kwaze kwabuya amanye azama ukuthulisa umsindo loba nje kungelamsekeli weDynamos owabotshwayo.”
Umaqhuzu wePremier Soccer League uKennedy Ndebele uthe udaba uluzwile ngakho bazahlaziya imbiko mayelana lobudlwangudlwangu lobu.
