uMthunywa
Nkosilathi Sibanda
UMcClive Phiri kungenzakala aphenduke kuqembu leHighlanders nanko phela akucaci ukuthi uzenelisa ukudlalela iTshakhuma Tsha Madzivhandula (TTM) esithenge iBidvest Wits ngesizini elandelayo.
Iqembu laseLimpopo leli belidlala kuligi ephansi kodwa selizangena kuPSL lithatha indawo yeBidvest Wits. Lokhu, ngokutsho kweqembu, kuzakuba lokutshintshwa kwabadlali, okuyikho okufake uPhiri ekhoneni ngoba kakatshelwa ukuthi uzabe ekhona ehlelweni lomqeqetshi.
Ukuthengiswa kweBidvest Wits kube yisimanga kuPhiri ngoba ubengakazitshengiseli ukuthi uphethe ibhola elinjani. Ubonakale kumidlalo embalwa egqoke isikipa seBidvest Wits, iqembu angena kilo ngoNhlolanja.
Ngemva kwemidlalo embalwa, iligi ye-Absa yamiswa ngoba sekulegcikwane leCovid-19.
Abadlali beBidvest Wits sebedingwa ngamanye amaqembu aphezulu eMzansi. Ngeviki edluleyo iOrlando Pirates ithethe uTerrence Dzvukamanja.
Imakethe yokuthengiswa kwabadlali ivulwe mhlaka 22 kuMpandula ize iyevalwa mhlala 17 kuLwezi. Kukhangelelwe ukuthi nxa uPhiri engasuswa eqenjini, abizwa ngamanye akuPSL kumbe akuligi ephansi.
Ukuphenduka kwakhe kuBosso kungenzeka ngoba inkokheli zaleli qembu kubikwa zincenga ukuthi lumdlali acabange ekhaya. IBosso isenkingeni yokuthi inengi labadlali bayo bengaya kuFC Platinum.
Umphathi kaPhiri kwezenguqu ubike ukuba uzathi ukuthola isikhathi ayefika eMzansi elande ukuyazwisisa ngaloludaba.
Uthe kunzima ukuthi aphathe ingxoxo ecingweni mayelana ngomsebenzi womdlali wakhe ngakho kumele ayefika khona.
“Ukukhuluma lalo iqembu (TTM) mayelana ngalumdlali akufuni ecingweni,” kutsho uDalubuhle Bhebhe umaneja kaPhiri.
Kunsuku ezilandelayo abalandeli bakaPhiri bazakwazi ngokugcweleyo ngoba sekuvunyelwa ukuthi abantu bachaphe imgcele phakathi kwe-Zimbabwe lesizwe se-South Africa.
Kuzwakale ukuthi uMcClive labanye bakhe ababeku-Bidvest Wits abazange bathole iholo labo lenyanga kaMpandula. Udaba lwabo lusezandleni zenhlanganiso ye- South African Football Players’ Union.
