uMthunywa
Cornelius Luphahla
IZAKHAMIZI zeDaluka kuwadi 19 eLupane sezisukumele phezulu zabopha inyathelo lokugebha idamu elizaphathisa ukuthi kutholakale amanzi okunathisa izifuyo.
Sekuleminyaka indawo le isilela amanzi, okuyikho osekuvuse inyathelo lokugejwa kwedamu leMbuzimbili.
Iziqinti ezihlaselwe kakhulu yikusilela kwamanzi zigoqela iDaluka, Mafinyela kanye le-26. Ngesikhathi sebusika amanzi atholakala khatshana lemizi lamadlelo.
UMthunywa ukhulume loMnumzana Mphathi Mnkandla usobhuku weMafinyela ochaze ukuthi idamu likhona kodwa lidinga ukugejwa kusiyaphambili.
Idamu leMbuzimbili leli kwakumele lakhiwe kudala kodwa umsebenzi awusaphumelelanga.
“Idamu likhona loba nje lingagejwanga okupheleleyo. Okumele kwenziwe yikuthi lakhelwe umbundu ngoba kwelinye icele kulentaba eziligqagqeleyo.
“Amanzi liyawagcina kodwa uhlupho yikuthi amanengi asuka adlule ngokuswelakala kombundu. Lokhu kudala ukuthi amanzi la acitshe ebusika,” kutsho uMnu Mnkandla.
Esinye isakhamizi seGubungane uMnumzana Vusa Ncube ubikele uMthunywa ukuthi idamu leli lingakhiwa lizanceda isigaba ngendlela ezitshiyeneyo.
Kuzwakale ukuthi asekhona amaphurojekithi okulima kulindawo nxa kungalungisiswa idamu.
“Idamu leli nxa lingagejwa lizanceda abantu ngamanzi okwenza amaphurojekithi anjengokulima. Lokhu kungathuthukisa isigaba ngoba amanzi yilo uhlupho olubisela emuva ingqubekela phambili.
“Okunye njalo idamu lingagejwa linganceda kakhulu intsha ngoba izaqala ukwenza imisebenzi yezandla engaletha intuthuko esigabeni,” kutsho uMnu Ncube.
Indlala layo isibhahile ngenxa yokusilela kwamanzi.
UNkosazana Angela Ndebele okhokhela amaphurojekithi ezakhamizi eGandangula uchaze ukuthi imigodi yamanzi milutshwana ezigabeni lezi ngakho izifuyo zithwele nzima ngokuswela amanzi.
“Imigodi esilayo mithathu ngakho kusuka kube nzima ngoba izifuyo zinatha ndawonye labantu okudala ukuthi amanzi aphele masinyane.
“Ezinye izifuyo ziyacuba ngenxa yokuswelakala kwamanzi, kuthi ezinye ziyanyamalala zintule leganga zidinga amanzi,” kuchaza uNkszn Ndebele.
Izakhamizi zikhala zisiyaphambili ngokufuna ukuthi kwakhiwe njalo ibholoho kule indawo.
UMnumzana Frenky Ndlovu ongomunye wabosobhuku beMafinyela ubike ukuthi ibholoho elikhona lincane kakhulu.
“Ibholoho esilalo lincane kakhulu ngakho kuhlala kusenzakala ingozi ezinengi nxa umfula ugcwele. Abanye abantu bayake bathathwe ngamanzi kanye lezinqola balahlekelwe zimpilo zabo.
“Ubuncane balelibholoho budala ukuthi izakhamizi zehluleke ukuchapha zisiya esibhedlela nxa umfula ugcwele.
Abantwana besikolo bathwele nzima ngoba inengi labo aliyi esikolo nxa umfula ugcwele ngenxa yokuswelakala kwebholoho.
“Isifiso sethu yikuthi uHulumende angenele kulezinhlupho esihlangana lazo ukuze isigaba sethu sithuthuke,” kuphetha uMnu Ndlovu.
